Nga Bashkim Kastrati
Viti 2015 pritej që të karakterizohej me realizmin e projekteve të mëdha ekonomike, e që rrjedhimisht të hapeshin edhe shumë vende të reja pune. Këto pritshmëri të qytetarëve u krijuan nga premtimet e partive politike që tash janë në pushtet, por në realitet ashtu nuk ndodhi. As nuk u hapen vende të shumta të punës, e as nuk u investua në projekte të mëdha ekonomike, të cilat do të gjeneronin vende të reja të punës dhe do të ndikonin edhe në uljen e shkallës së varfërisë në Kosovë.
Gjatë vitit 2015 gjiganti metarolgjik “Trepça” mbeti pa status të definuar edhe pse fillimisht kishte tendenca të tilla, por ishte vet qeveria e Kosovës që u tërhoq nga iniciativa e saj qysh në fillim të vitit 2015 dhe më nuk është bërë asgjë konkrete në këtë drejtim, pra në Kuvendin e Kosovës nuk është dërguar asnjë strategji apo ligj që do të përcaktonte fatin e “Trepçës”.
Projekt tjetër i madh ekonomik që dështoi ishte Telekomi i Kosovës. Edhe pse pritej që kjo ndërmarrje publike të privatizohej dhe të bëheshin investime të mëdha në të, një gjë e tillë nuk ndodhi.
Kompania AXOS Capital në konsorcium më “Najafi Companies LLC” kishte fituar tenderin për blerjen e 75 për qind të aksioneve të PTK-së, në vlerën e 277 milionë eurove. Nga ky proces kishte mbetur vetëm nënshkrimi i kontratës, por çështje ngeci aty dhe i gjithë procesi dështoi. Kompania në fjalë ka bërë padi në arbitrazh kundër qeverisë së Kosovës si fajtore e dështimit të këtij privatizimi dhe tani kërkon hiq më pak se në 50 milionë euro dëmshpërblim.
“Të gjendur në këtë situatë dhe në pamundësi të procedoj me nënshkrim të kontratës për shitje të aksioneve të PTK-së, Komisioni Qeveritar për Privatizim ka vendosur ta përmbyll procesin e privatizimit të 75% të aksioneve të PTK-së”, thuhej në komunikatën e Ministrisë së Zhvillimit Ekonomik.
Privatizimi i Post-Telekomit u kundërshtuar nga opozita dhe nga një pjesë e ekspertëve të telekomunikacionit, duke e parë si të panevojshëm, pasi që ajo gjeneron të hyra të mëdha dhe nuk ka nevojë që të privatizohet si e tillë.
Në vitin 2015 pritej që të realizohet investimi i mbi 400 milionë eurove në kompleksin turistik “Brezovica”. Por kjo nuk u realizua për shkak se Konzorciumi nga Franca “MDP Consulting – Compagnie des Alpes” nuk ka arritur t’i sigurojë paratë për të filluar punimet për ndërtimin e qendrës së re turistike në Brezovicë. Duke u përballur me këtë situatë, Qeveria e Kosovës po bën edhe një tendencë tjetër që ky proces të mos dështojë dhe për këtë arsye ka vendosur t’i jap edhe gjashtë muaj afat investitorit që t’i grumbullojë paratë që duhet investuar.
Në fund të vitit 2015 kishte zhvillime konkrete sa i përket ndërtimit të termocentralit “Kosova e Re”. Ky projekt që tash e sa vite është prioritet i qeverisë dhe ka ndryshuar kapacitetet për disa herë, më në fund mund të fillojë që të realizohet. Në dhjetor të vitit 2015 Qeveria e Kosovës dhe kompania amerikane “Contrur Global” nënshkruan Memorandumin për ndërtimin e këtij termocentrali.
Ndërtimi i termocentralit në fjalë pritet që të zgjidh problemin furnizimit me energji elektrike, problem me të cilin qytetarët e Kosovës përballen që nga paslufta. I gjithë projekti ka koston e 1 miliard eurove dhe do të ketë kapacitet 500 megavatesh dhe pritet të përfundojë në vitin 2022.
Gjithashtu edhe Banka Botërore është pajtuar me marrëveshjen e arritur në mes të Ministrisë së Zhvillimit Ekonomik dhe kompanisë “Contour Global” për ndërtimin e termocentralit. /tesheshi.com/
