Nga Blendi Gashi
Kryeqyteti i Kosovës, Prishtina u kall sërish. Dhe kjo ndodhi pas arrestimit të deputetes opozitare të AAK-së, Donika Kadaj Bujupi.
Ky akt nga ana e policisë, ndërmarrë pa dyshim me porosi politike, shihet si një gabim nga juristë dhe analistë të njohur, pasi sipas tyre nuk e plotëson asnjë kusht ligjor të paraparë me Kushtetutë dhe me Kod Penal; madje i cilësojnë si arrestime politike.
Sepse sipas tyre, është krejtësisht e padrejtë që të arrestosh ligjvënës për shkak të akteve politike brenda fushëveprimit të tyre.
Juristi Vigan Qorolli:“Nga aspekti juridik është pak e besueshme që Prokuroria të jetë në gjendje të vlerësojë provat të cilat kanë të bëjnë me një ndodhi siç ka ndodhur ajo me zë dhe me figurë në Kuvendin e Kosovës. Organi i akuzës me sa duket në tërësi bazohet në prova publike – të cilat i ka parë në tërësi opinioni publik kosovar. Kjo është themelore dhe paraqet një “gabim në hapa” të Prokurorisë, e cila nuk ka nevojë të hetojë diçka që është publike, e parë dhe e dëgjuar në Televizor. Çdo arrestim mbi bazën e një inercioni të tillë emocional apo çdo ngritje akuze për veprimet kryekëput politike të deputetëve opozitarë – do të ketë pasoja po kaq të rënda politike në sytë e qytetarëve – gjë që do të konsiderohej si drejtësi selektive dhe qërim politik i hesapeve mes dy kampeve politike. Kjo në fakt do të paraqiste as më shumë e as më pak sesa një hakmarrje primitivisht politike – çka pashmangshmërisht do të sjell një reagim publik me protesta në mbrojtje të një kauze thellësisht politike”, thotë juristi Qorolli.
Analisti Arben Qirezi: “Në fakt, imuniteti shërben për të mbrojtur deputetët, kur brenda fushëveprimit të tyre ata tejkalojnë metodat e debatit verbal politik dhe ndërmarrin akte që mund të interpretohen si shkelje të kodit penal. Përndryshe, nuk do të kishte nevojë për kategorinë e imunitetit. Pra, deputeti mund ta realizojë mandatin e vet në mënyrën se si ai/ajo e sheh të arsyeshme dhe për këtë mban përgjegjësi politike. Imuniteti e mbron atë nga përgjegjësia ligjore”, ka shkruar Qirezi në Facebook.
Ai më tej thotë se hedhja e gazit lotsjellës nga ana e deputetëve të opozitës, me ndihmën dhe bashkëveprimin e të gjithë deputetëve opozitarë, është akt politik, sepse bëhet për të shfaqur mospajtimin me politikat e qeverisë, sado që njerëzit mund të mos pajtohen me mënyren e tillë të shprehjes politike.
“Prandaj, arrestimi i deputeteve për shkak të akteve politike, që është brenda fushëveprimit të tyre, është cenimi më i rëndë që i bëhet mandatit të deputetit dhe që i është bërë Kushtetutës së Kosoves dhe demokracisë në Kosovë deri më tani”, thotë Qirezi.
Besa Luzha, koordinatore e programit në fondacionin gjerman ‘Friedrich Ebert Stiftung’, thotë se diktatura e shumicës megjithatë nuk nënkupton që shteti të sillet si diktator.
“Arrestimet politike nuk i kontribuojnë zgjidhjes, përkundrazi e thellojnë atë.#JoDiktaturës. Kish me qenë mirë të gjithë me e kuptu nenin 75-të, të Kushtetutës për me e kuptu a kanë të drejtë me arrestu deputete. nëse nuk ju pëlqen, le ta ndërrojnë Kushtetuten me 2/3, por për momentin është kështu!”, ka shkruar Luzha në Facebook.
Edhe ish analisti, tani zëdhënësi i AAK-së Muharrem Nitaj, në emër të tij personal përmes një postimi në Facebok, ka reaguar ndaj arrestimit të deputetes Donika Kadaj- Bujupi dhe lidhur me zhvillimet e fundit. Ai ka kërkuar që të ketë reflektim nga Isa Mustafa, Hashim Thaçi, Atifete Jahjaga dhe nga liderët e partive opozitare.
“Ju liderët politik e institucional të Kosovës, vendi është në krizë politike dhe kërkon ndërhyrje urgjente. Kjo krizë politike është thellë dhe nuk zgjidhet me polici. Mos e sfidoni policinë e shtetit dhe mos e shndërroni atë në mjet për zgjidhjen e krizave politike.
Ju dy shefat e shtetit, Hashim Thaçi e Isa Mustafa, vendi që ju e qeverisni nuk është në ditët më të mira të tij, dhe fajin për këtë e keni ju dhe vetëm ju, prandaj reflektoni ooo njerëz.
Ju Presidente Jahjaga po dështoni për të qenë faktor i unitetit, dhe vendi po rrezikon të rrëshqasë në anarki. Ju duhet duhet ta impononi dialogun politik, si formë të daljes nga kriza, ose duhet të largoheni nga detyra.
Ju prokurorë dhe gjyqtarë, vendi është në krizë politike dhe nuk zgjidhet as me arrestimin e as me dënimin e deputetëve. Ata duhet të jenë të lirë.
Refuzoni urdhërat politik dhe mos u bëni instrument i askujt, sepse vendi është në krizë politike e cila nuk zgjidhet me mjete ligjore.
Ju liderë të opozitës Haradinaj, Kurti e Limaj, rishikoni metodat e kundërshtimit tuaj të drejt, dhe bëhuni liderë të një aktivizmi qytetar e civil, sepse kjo është arma më e fortë e mbrojtjës së shtetit.
Dhe në fund, ju diplomatë të të gjitha vendeve perendimore në Prishtinë, edhe një herë vendosuni në mbrojtje të Kosovës së pavarur dhe qytetarëve të saj dhe ndihmojeni atë që ta kapërcejë këtë sfidë, që po merr përmasa shqetësuese!
Reagimi është personal dhe jo në emër të AAK-së”, ka shkruar Nitaj. /tesheshi.com/
