Kosova çdo ditë e më shumë po bëhet vend tërheqës për turistët dhe kjo po ndodh me angazhimin dhe promovimin e agjencive private turistike dhe jo nga autoritetet shtetërore.
Rajoni qendror turistik i Prishtinës, ai i Alpeve Shqiptare, Sharrit, Mitrovicës dhe ai i Anamoravës, konsiderohen si pesë destinacionet kryesore turistike në Kosovë.
Zekë Çeku, ekspert dhe drejtues i Shoqatës së Turizmit në Kosovë, thotë se po vërehet një rritje e numrit të turistëve, sidomos e alpinistëve nga Shqipëria, Turqia, Franca dhe vendeve tjera rajonale që kalojnë nëpër Kosovë.
Sipas tij, përfshirja e Kosovës në projektin e turizmit në natyrë “Via Dinarica”, platformë, kjo që shërben për të promovuar trashëgiminë kulturore dhe për zhvillimin e shumë sektorëve të turizmit, ka ndikuar shumë në lëvizjen e turistëve të huaj.
“Në fillim të këtij viti Kosova është përfshirë në projektin ‘Via Dinarica’, e cila shtrihet nga Sllovenia deri në Greqi. Jemi në fillim të projektit për Bjeshkët e Sharrit, që është i ngjashëm me atë ndërkufitar ‘Majat e Ballkanit’ – Kosovë, Shqipëri Mal i Zi”, thotë Çeku për Radio “Evropa e Lirë”.
Megjithatë, ai shprehet se përveç numrit të vizitorëve rezidentë vendorë, një numër të madh janë edhe turistët e huaj apo qytetarët që jetojnë dhe punojnë në vende të ndryshme.
“Turizmi malor ka një trend pozitiv, sidomos gjatë verës kur vijnë qytetarët nga diaspora, pasi ata janë financuesit kryesor të udhëtimeve. Por, shihet një trend pozitiv i interesimit të vendorëve për vizita të pikave turistike në natyrë”, thekson Çeku. /tesheshi.com/
