Presidenti serb Aleksandar Vuçiç dhe lideri rus Vladimir Putin biseduan në telefon për situatën në Ukrainë dhe zhvillimin e ngjarjeve rreth Kosovës, tha Kremlini.
Në një deklaratë të lëshuar thuhet se Rusia do të vazhdojë furnizimin e pandërprerë të gazit në Serbi.
“Është zhvilluar një bisedë telefonike mes Presidentit të Federatës Ruse, Vladimir Putin dhe Presidentit të Serbisë, Aleksandër Vuçiq.
Është rënë dakord, ndër të tjera, që Rusia të vazhdojë furnizimet e pandërprera të gazit natyror në Serbi”, thuhet në deklaratë.
Marrëveshja aktuale për furnizimet me gaz rus skadon më 31 maj.
Vuçiç tha më herët se kishte tre pyetje për Putinin.
“Nuk mund ta di se çfarë do të më kërkojë Putini, por e di se çfarë do ta pyes. Për mua tema e takimit janë sasia e gazit, çmimi i gazit dhe siguria e furnizimit me gaz”, ka theksuar Vuçiç.
Vuçiç tha se sot në mëngjes ka pasur një bisedë të mirë me presidentin rus, se kanë biseduar për disa tema të ndryshme dhe se më e rëndësishmja për Serbinë është ajo për marrëveshjen e re të gazit.
Pas bisedës me Putinin, Vuçiç i dërgoi një letër drejtorit të “Gazprom” për të diskutuar nesër për dërgesat e reja të gazit.
Sipas tij, për shkak të përparimit industrial, Serbia do të ketë nevojë për sasi më të mëdha të gazit në të ardhmen.
Nga ana tjetër, nuk dihet se për çfarë është folur mbi Kosovën. /tesheshi.com/
