Albin Kurti dhe Isa Mustafa konfirmuan arritjen e marrëveshjes mes tyre, e cila vjen pas një sage prej afro katër muajsh. Ndodhi kjo bash në ditën kur dhe akademik Qosja vendosi të apelojë ndaj tyre, duke zgjedhur madje t’i inspirojë me shembuj nga historia se si dhe armiqtë kanë arritur të bëjnë pakt mes tyre.
“Ne sot u takuam me Isa Mustafën dhe u pajtuam që të takohemi edhe nesër në seancën e Kuvendit për ta zgjedhur qeverinë e re dhe në këtë mënyrë ta institucionalizojmë ndryshimin e madh të 6 tetorit.
Ne tashmë e kemi nënshkruar marrëveshjen – jemi marrë vesh për të gjitha përveç harmonizimit të programit”, tha Kurti para mediave në Prishtinë.
“Kjo marrëveshje është rezultat i mirëkuptimit dhe një pune të gjatë me Kurtin, por edhe me bashkëpunëtorët e tij. Kemi shqyrtuar të gjitha alternativat dhe kemi ardhur në një zgjidhje që vlerësojmë se është në dobi të Kosovës. Mendojmë që kjo qeveri të jetë në të mirën e të gjithëve”.
Ndërsa për postin e presidentit thanë se do të merren vesh mes njëri-tjjetrit kur t’i vijë koha.
“Kemi vendosur që presidenti të mos jetë pjesë e marrëveshjes që sot e kemi nënshkruar por të dakordohemi me Kurtin dhe ta zgjidhim në kohën që është e domosdoshme”, tha Mustafa.
Ndërsa Kurti konfirmoi se Glauk Konjufca do të kalojë në kabinetin e ri, për t’ja lënë drejtimin e Kuvendit njeriut që do zgjedh LDK-ja. /tesheshi.com/
