Ndotja e ajrit për disa ditë të tëra në Prishtinë më në fund ka alarmuar dhe qeverinë e Kosovës e cila ka miratuar kërkesën e Ministrisë së Mjedisit dhe Planifikimit Hapësinor, për krijimin e Task-forcës e cila do të merret me masa për mbrojtje.
Ministrj e Mjedisit, Albena Reshitaj, ka kërkuar nga Ministria e Arsimit të ndërpresë furnizimin me thëngjill të shkollave të cilat do të eliminonin ndotjen e ajrit si dhe nga Ministria e Infrastrukturës monitorimin e lëndëve djegëse.
Reshitaj gjithashtu ka kërkuar nga Ministria e Zhvillimit Ekonomik që ta ndërprejë dhënien e thëngjillit falas për punëtorët e KEK-ut, dhe gjithashtu nga Ministria e Shëndetësisë ka kërkuar statistika shëndetësore për ndotjen.
Edhe sot ajri në kryeqytet vazhdon të jetë shumë i pashëndetshëm për qytetarët.
Bazuar në matjen e bërë nga Qendra për matjen e cilësisë së ajrit, e vendosur nga Ambasada Amerikane në Prishtinë, në orën 11:00, vlera e ndotjes ka arritur në 289 që konsiderohet shumë e pashëndetshme.
Sipas rang-listës botërore, Prishtina ende vazhdon të kryesojë këtë listë si vendi me ajrin më të ndotur në botë. Pas Prishtinës, radhitet Pakistani, Kina, Maqedonia, India dhe shumë vende të tjera.
Ndërkaq, Instituti Kombëtar i Shëndetësisë Publike ka njoftuar se me nivelin e lartë të ndotjes së ajrit në Kosovë, e veçmas në Prishtinë, efektet afatshkurta na çojnë drejt rritjes së numrit të të sëmurëve me astmës bronkiale, bronkitet kronike, sëmundje kronike obstruktive të mushkërive te moshat e shtyra, rritjen e numrit të pranimeve spitalore nga sëmundjet kardiovaskulare dhe ato respiratore, kancer, shkurtimin e jetës dhe rritjen e shkallës së mortalitetit.
Për shkak të gjendjes alarmante, ISHP-ja apelon të reduktohen daljet në mëngjes dhe mbrëmje. /tesheshi.com/
