Kryetari i Komitetit Olimpik të Kosovës (KOK), Besim Hasani, beson se reprezentacioni i Kosovës pritet të përfaqësohet në Lojërat Evropiane “Baku 2015” me mbi 20 sportistë.
Numri final i garuesve kosovarë për pjesëmarrje në evenimentin e parë në histori, që mbahet në Azerbajxhan, pritet të dihet gjatë mbledhjes së Asamblesë së Komitetit Olimpik të Evropës, që pritet të mbahet në Antalia të Turqisë, më 14-15-16 maj, por tashmë dihet afërsisht se sa sportistë të vendit tonë do të jenë atje.
“Momentalisht janë 15 sportistë që e kanë të sigurt pjesëmarrjen në Baku. Mirëpo, numri i tyre pritet të rritet në 23, në mbledhjen e Komitetit Olimpik të Evropës”, deklaroi për “Zërin” presidenti Hasani, i cili pritet të jetë prezent në Turqi. Kosova pritet të përfaqësohet në “Baku 2015” me rreth 10 sporte dhe synon së paku një medalje. /tesheshi.com/
