Autoritetet e shëndetit publik konfirmuan “pastërtinë” e Shqipërisë nga koronavirusi, edhe pas testimeve të fundit.
Në komunikimin e përditshëm me median, përfaqësuesja e Task-Forcës së ngritur nga Ministria e Shëndetësisë, Eugena Tomini, tha se 5 rastet e reja të testuara rezultuan negative.
“Gjatë ditës së djeshme janë testuar 5 raste të reja në Laboratorin e Virologjisë pranë ISHP nga ku në total numri i rasteve të tetuara ka shkuar në 36. Të gjitha rastet kanë rezultuar negative për COVID 19. Rastet kanë pasur shenja të infeksionit respirator dhe histori udhëtimi me vendet ku ka shpërthim epidemik dhe komunitar te koronavirusit te ri”, tha Tomini.
Ministria e Shëndetësisë rekomandon qytetarët që kane udhëtuar në vendet e prekura dhe kanë shenjat e infeksionit viral të telefonojnë 127 për të marrë udhëzimet e duhura se si të veprojnë mbështetur në gjendjen e tyre shëndetësore.
Nga ajo çfarë raportoi znj.Tomini, në 24 orët e fundit, thirrjet kundrejt numrit 127 ka arritur nivelin e 1649 telefonatave nga të cilat 39 prej tyre janë vlerësuar në lidhje me infeksion viral respirator dhe histori udhëtimi me Italinë. Për fat, asnjë rast nuk ka rezultuar me koronavirus. /tesheshi.com/
