Opozita dha shenjat e para të një qasjeje me “politikë dite” edhe në rastin e koronavirusit.
I mbërritur në Italinë fqinje, duke rrezikuar kështu dhe Shqipërinë, nën një atmosferë ankthi publik, PD i është referuar ish-liderit të saj ende aktiv, Sali Berisha, duke thënë në formë akuze se qeveria do shndërrojë spitalin e Kavajës në karantinë.
Ishte Sekretari i Përgjithshëm i demokratëve, Gazmend Bardhi, i profilit “skifter” në betejën e përditshme politike, që tha se “sot në repartin e patologjisë dhe urgjencës në Spitalin e Kavajës kanë nisur përgatitjet, me urdhër të Ministres së Shëndetësisë, për ta kthyer në Karantinë. Kjo është papërgjegjshëri! Zgjedhja e një spitali të një qendre të banuar për Karantinë është kërcënim serioz për jetën e të gjithë banorëve”, shkruan Bardhi, sipas së cilit ky është provokim.
“Ky është një provokim i rëndë me Kavajën! I bëj thirrje të gjithë bashkëqytetarëve të mi të mos e pranojnë trajtimin nga Edi Rama si banorë të parëndësishëm, jeta e të cilëve nuk ka rëndësi për Kryeministrin. Karantinën ta ndërtojë në shtëpinë e tij në Surrel, jo në Kavajë!”, shprehet nr.2 i PD-së, duke dhënë të kuptuar se koronavirusi mund të jetë dhe “kauza e re” opozitare.
Ministria e Shëndetësisë nga ana e saj, nëpërmjet njëriut nr.1 që merret me këtë çështje, specialisja e njohur infeksioniste Silva Bino, mohoi që në spitalin e Kavajës po bëhej gati ndonjë karantinë. /tesheshi.com/
