Koreja e Veriut i ka thënë Kombeve të Bashkuara se nuk do të negociojë kurrë për çmontimin e arsenalit bërthamor derisa Shtetet e Bashkuara të mos e ndryshojnë politikën e saj “armiqësore”, duke paralajmëruar se “një luftë bërthamore mund të shpërthejë në çdo kohë”.
Ambasadori koreanoverior në OKB, Kim In-ryong, i tha Komitetit për Çarmatim të Asamblesë së Përgjithshme se situata në gadishullin korean “ka arritur një pikë shumë kritike dhe se një luftë bërthamore mund të shpërthejë në çdo kohë”, raportoi AFP.
“Në qoftë se politika armiqësore dhe kërcënimi bërthamor i Shteteve të Bashkuara nuk zhduken plotësisht, ne kurrë nuk do të vendosim armët tona bërthamore dhe raketat balistike në negociata në asnjë rrethanë”, tha ai.
Diplomati i Koresë së Veriut tha se pas një serie lëshimesh të raketave dhe testit të gjashtë bërthamor, vendi i tij “kaloi nëpër portën e fundit” në rrugën drejt statusit të një fuqie bërthamore të plotë, me aftësinë për të kryer një sulm bërthamor.
“I gjithë territori tokësor i Shteteve të Bashkuara është brenda kapaciteteve tona dhe nëse SHBA sulmojnë qoftë edhe një centimetër të territorit tonë të shenjtë, nuk do të mund t’i ikë dënimit tonë në asnjë pjesë të botës”, tha Kim.
Ai vuri në dukje se Koreja e Veriut nuk do të vë në shënjestër asnjë vend që nuk bashkohet me fushatën ushtarake të drejtuar nga Shtetet e Bashkuara.
“Derisa të mos marrë pjesë në aksionet ushtarake amerikane kundër Koresë së Veriut, ne nuk kemi ndërmend të përdorim armët bërthamore ose t’i kërcënojmë me armë të tilla asnjë vend tjetër”, tha ai.
Sakaq, Shtetet e Bashkuara dhe Korea e Jugut filluan një stërvitje të përbashkët detare dhjetë ditëshe të hënën, në një shfaqje të re të forcës kundër Phenianit, duke përfshirë një transportues ajror të SHBA dhe dy shkatërrues amerikanë, vuri në dukje agjensia franceze. /tesheshi.com/
