Rreth 400 koreanojugorë, pjesa më e madhe pleq, shumë prej të cilëve te të tetëdhjetat, u mbartën dje në një resort malor në anën tjetër të kufirit, në Korenë e Veriut, ku u takuan me të afërmit e tyre, me të cilët qenë ndarë gjashtë dekada të shkuara. Por ndryshe nga një ditë më parë, kur takimet u zhvilluan mes kamerave, ata u lanë të çmallen në dhoma më vete, larg syrit të publikut.
Ribashkimi i kësaj jave vjen pas atij të shkurtit të vitit të shkuar, dhe është i mbikëqyrur rreptë. I ndarë 
në dy kohë, tre ditët e para të kësaj ngjarjeje do të bashkojnë 96 koreanoveriorë dhe familjet e tyre me 390 koreanojugorë, e në treditëshin e dytë, që nis të shtunën, do të bëhen bashkë 190 koreanoveriorë me 90 koreanojugorë dhe familjet e tyre.
Familjet do të qëndrojnë dy orë së bashku, e janë këshilluar t’i shmangin bisedat rreth temave kritike, siç janë politika dhe standardet e jetesës.
Koretë u ndanë pas fundit të Luftës së Koresë në 1953-shin, e që atëherë mijëra njerëz në të dy anët e kufirit e kanë të pamundur të takohen me të afërmit e tyre, me prindërit, vëllezërit e motrat. Ata nuk kanë mënyra komunikimi, e dinë shumë pak për njëri-tjetrin.
130.000 koreanojugorë kanë aplikuar që nga viti i largët 1988 për t’u ribashkuar me pjesëtarët e tjerë të familjeve në Korenë e Veriut, por vetëm 1.900 prej tyre u ka buzëqeshur fati.
Programi i ribashkimit nisi pas një takimi historik mes dy vendeve në vitin 2000, por numri i familjarëve të takuar me njëri-tjetrin ka qenë shumë më i vogël nga ç’janë kërkesat. /tesheshi.com/
