Korça u zgjua e tronditur këtë mëngjes nga një ngjarje e pazakontë, me në fokus një grabitje. Në shtëpinë e kambisit Shefqet Muço, tre grabitës me maska hynë për të marrë prej aty shuma monetare, por ndërsa dy arritën t’ja mbathin, një i tretë u kap nga familjarët dhe një përleshje pati mes tyre.
“Më datë 11.01.2021, rreth orës 06:10, në lagjen nr. 1, në rrugën e ‘Bilbilave’, Korçë, tre persona dyshohet se nën kërcënimin e armës i kanë vjedhur me dhunë shtetasit Sh. M., me profesion kambist, një sasi lekësh para banesës së tij.
Reagimi i menjëhershëm i Policisë, bëri të mundur ndalimin e njërit prej autorëve të dyshuar të ngjarjes, i cili ndodhet aktualisht për ndihmë mjekësore në Spitalin e Korçës, pasi ka marrë lëndime gjatë përplasjes fizike me kambistin dhe forcat e policisë, ku ka tentuar të shmangë kapjen nga ana e tyre.
Ndërsa po punohet për identifikimin dhe kapjen e autorëve të tjerë, të cilët kanë mundur të largohen me shpejtësi nga vendngjarja me një automjet.
Nga ana e Policisë janë ngritur pika kontrolli, po bëhet krehja e zonës si edhe po kryhen veprime të tjera hetimore, të cilat do të ndihmojnë në zbardhjen e sqarimin e plotë të rrethanave të ngjarjes”, thuhet në deklaratën e Policisë.
Nga ana tjetër, një fqinj rrëfeu atë çfarë pa.
“E sulmuan nga rruga sipër. Katër thonë ato, po unë i pashë katër. Pashë vetëm një që Shefqeti e kishte vënë poshtë. Shefqeti i gjakosur këtej, gruaja e goditur, djali i tij ka ndrydhur dorën.
Unë vajta vetëm sa ia hoqa derën. I vajti tjetri me pistoletë i tha lëshoje, Shefqeti i tha ‘nuk e lëshoj më vrit. Kjo ishte e gjithë.
Unë pashë me doreza, autorin, për të mos e vrarë fare e hoqa Shefqetin, lëre se vjen policia i thashë. E kanë goditur Shefqetin te koka, fytyra, djalin nga duar, iu gjend e gjithë lagjja në ndihmë, ça të bënim”, tregon ai. /tesheshi.com/
