Konstituohet Komisioni për Dekriminalizimin dhe zbatimin e vendimeve të Gjykatës Kushtetuese. Opozita ka rikthyer edhe njëherë akuzat për kriminalizim të Parlamentit në nisje të seancës së sotme, cka ka sjellë dhe reagimin e mazhorancës. Deputetët e mazhorancës kërkuan që konkluzionet të dalin në fund të komisionit, ndërkohë që për ta pika për zbatimin e vendimeve të Gjykatës Kushtetuese është pa sens. Pavarësisht kësaj, mazhoranca u shpreh e gatshme të bashkëpunojë me opozitën për çka kërkohet.
Deputeti demokrat, Oerd Bylykbashi, tha se “ndryshimet politike nxorën në pah rekorde kriminale. Besoj se ky komision do të funksionojë me vullnet për t’i dhënë zgjidhje dekriminalizimit dhe zbatimit të vendimeve të gjykatave”, Ndëkaq, Taulant Balla, deputet i Partisë Socialiste tha se “prej ditës së parë qoftë PS qoftë LSI kanë shprehur dakordësi. Kolegët të bien dakord që t’i bëjmë në fund konkluzionet. Çështjet duhen adresuar. Edhe marrëveshja është bërë në këtë sallë të Komisionit të Integrimit siç po bëjmë dhe sot. Jo çdo gjë që thotë opozita është e drejtë. Të ngresh komision për zbatimin e vendimeve kushtetuese është njësoj si të thuash a do zbatojmë ligjin. Besoj e keni kuptuar 6 muaj jashtë kuvendit këtë gabim”.
Ndërkaq Spartak Braho deputet i LSI-së i ka kërkuar shpjegime opozitës se çdo të thotë persona me rekorde kriminale , duke u shprehur më tej se opozita po bën demagogji. “Në rezolutë janë nominuar 3 çështje, dy prej të cilave kanë zgjidhje. Pika tre, çfarë do të thotë persona me rekorde kriminale? Këtu ka dhe demagogji. Te heqim këtë cilësorin “ky është kriminel” se ju e keni të zhvilluar këtë. Nëse se hiqni unë do them në çdo mbledhje që kryekriminel është Sali Berisha”, tha Braho. Në reagim, Bylykbashi tha se “Puna e komisionit do ta qartësojë çdo të thotë rekorde kriminale”.
Nga ana tjetër opozita përmes deputetit Eduard Halimi tha se duke qenë se jemi para zgjedhjeve vendore duhet bërë gati një paketë ligjesh që të pengohet kandidimi i personave me precedent kriminal.“Nuk do bëjmë hetime të personave pasi nuk kemi kompetencë, por për të hartuar dispozita ligjore që ato fenomene të mos përsëriten. Nuk kemi ndonjë mundësi këtu t’i fusim këmbët në një këpucë mazhorancës. Kërkesat e opozitës për komisione hetimore janë refuzuar. Kryetarët e partive janë duke përzgjedhur kandidatët, paketë ligjesh që në zgjedhjet e ardhshme mos të kandidojnë persona me precedent criminal”, u shpreh Halimi.
