Kryeministri hungarez, Viktor Orban i përshkroi refugjatët që mbërrijnë në Europë si një “ushtri” ndërsa mbrojti qëndrimin e tij të vijës së ashpër kundër fluksit të emigrantëve, gjatë zhvillimit të kongresit të PPE-ve.
Duke folur në takimin e Madridit të partive konservatore nga i gjithë kontinenti, Viktor Orban tha se ajo me të cilën përballet Europa nuk është një krizë refugjatësh.
Nga podiumi i kongresit të partive konservatore, Orban paralajmëroi konfliktualitet dhe në takimet e afërta që liderët europianë do të mbajnë për këtë çështje.
“Eshtë fjala për një lëvizje emigratore e ndërtuar nga emigrantë ekonomikë, refugjatë dhe gjithashtu luftëtarë të huaj. Bëhet fjalë për një proces të pakontrolluar edhe të parregulluar”, tha ai në kongresin e partive popullore europiane.
“E drejta për dinjitetin njerëzor dhe sigurinë janë të drejta elementare, por edhe mënyra hungareze dhe gjermane e jetesës janë një e drejtë themelore që u takon të gjithë njerëzve në tokë”, tha ai.
Pothuajse 600 mijë njerëz që i ikin varfërisë dhe luftës, kryesisht nga Siria, Iraku dhe Afganistani kanë mbërritur në Europë deri tani, këtë vit, dhe barra e këtij fluksi ka rënë në vendet e Europës së Veriut, Gjermani dhe Suedi.
Hungaria i është përgjigjur kësaj lëvizjeje njerëzish, më e madhja në Europë që nga Lufta e Dytë Botërore duke ndërtuar një gardh çeliku me gjemba përgjatë kufirit të saj me Kroacinë, një hap që u mirëprit dhe u kritikua nga liderë të ndryshëm në Europë.
“Nuk mund të lëmë pa folur për cilësinë e demokracive tona”, tha Orban. Deklaratat e tij shkaktuan nervozizëm në sallë ndërsa Orban shkoi edhe më tej duke mbrojtur tezën e tij.
“A përputhet me lirinë e fjalës dhe informimit që media shfaq zakonisht gra dhe fëmijë ndërkohë që 70 për qind e emigrantëve janë burra të rinj që duken si një ushtri?”, e ngriti në formë pyetjeje Orban argumentin e tij në mbështetje të kundërshtisë ndaj refugjatëve.
“Vetëm pse ne nuk i konsiderojmë ata si armiq, ne nuk duhet të veprojmë kundër vetes sonë. Përgjegjësia jonë morale është t’i kthejmë pas këta njerëz tek shtëpitë dhe vendet e tyre”, tha Orban.
Qeveria hungareze u ofrua të ndihmojë emigrantët që iu është refuzuar azili në vendet europiane të kthehen në Turqi.
“Nëse është e nevojshme, ne jemi gati të lejojmë trenat që transportojnë emigrantët e paligjshëm nga perëndimi në Greqi e Turqi, përmes territorit tonë. Ne mund të vendosim në dispozicion edhe trenat hungarezë”, tha ministri i Brendshëm, Sandor Pinter për gazetarët pas një takimi me homologun serb, Nebojsa Stefanic.
Ata zhvilluan një vizitë në pikëkalimin kufitar, Roezke në afërsi të kufirit serbo-hungarez, skenë e përplasjeve të dhunshme midis emigrantëve dhe policisë hungareze më 16 Shtator. /tesheshi.com/
