Konfliktet në Siri dhe Ukrahinë kanë mbledhur në Hamburg të Gjermanisë ministrat e jashtëm nga shtetet anëtare të Organizatës për Siguri dhe Bashkëpunim në Evropë (OSCE).
Para takimit dy ditor, ministri i jashtëm gjerman, Frank Walter Steinmeier i ka bërë thirrje Rusisë që të ndihmojë në zbutjen e tensionit në Evropë dhe për armëpushim humanitar të menjëhershëm në Siri, gjatë takimit me ministrin e jashtëm rus, Sergei Lavrov.
Në një editorial të përbashkët të botuar në gazetën gjermane “Frankfurter Allgemeine Zeitung”, nga Steinmeier dhe homologët e tij austriak dhe italian, e kanë akuzuar Rusinë se po “minon themelet e arkitekturës së paqes në Evropë” përmes veprimeve të saj në Ukrainë.
Lavrov gjithashtu është takuar në Hamburg edhe me Sekretarin amerikan të Shtetit, John Kerry, i cili ka thënë se ai dhe ministri i jashtëm rus kanë biseduar për “situatën jashtëzakonisht të rëndë në Alepo”.
Lidhjet janë përkeqësuar pas nisjes së sulmeve ajrore të Rusisë në Siri dhe përkrahjes për qeverinë e presidentit sirian, Bashar al Assad gjatë luftës civile në këtë shtet.
Lidhjet e Moskës dhe perëndimit pësuan krisje pas aneksimit që Rusia i bëri gadishullit ukrainas të Krimesë në muajin mars të vitit 2014 dhe përkrahjes që po iu jep separatistëve në lindje të Ukrainës në luftën që deri më tani kanë humbur jetën rreth 10 mijë persona./tesheshi.com/
