Vazhdon të konfiskohet drogë me të madhe së fundmi edhe në Kosovë. Policia, dje ka realizuar një operacion në dy lokacione të ndara, i cili ka rezultuar me gjetjen dhe konfiskimin e mbi 13 kilogramë substancë narkotike si dhe me arrestimin e tre personave të dyshuar për kryerjen e veprave penale “blerje, posedim, shitje ose shpërndarje e paautorizuar e narkotikëve, substancave psikotrope ose analoge”.
Në rastin e parë janë bastisur dy lokacione në Prishtinë, ku gjatë bastisjes janë gjetur dhe janë konfiskuar gjithsej 4054.8 gramë (4 kg e 54.8 gr.), 4 telefona dhe 113.30 euro, të cilat dëshmi janë fotografuar dhe janë evidentuar nga krimteknika.
Me këtë rast është bërë arrestimi i tre personave të dyshuar të cilët dyshohet se kanë kryer veprën penale ‘blerje, posedim, shitje ose shpërndarje e paautorizuar e narkotikëve, substancave psikotrope ose analoge’.
Personat e arrestuar në këtë rast janë: S.S(1973) femër, shqiptare e Kosovës, B. H.( 2001), mashkull, shqiptar i Kosovës dhe O. S(1999), mashkull, shqiptar i Kosovës.
Me urdhër të Prokurorisë Themelore në Prishtinë personat e dyshuar dërgohen në qendrën e mbajtjes.
Në rastin e dytë pas marrjes së informatave se një person merrej me shitblerje të narkotikëve, me urdhër të Gjykatës Themelore Prishtinë, kanë bërë kontrollimin e një shtëpie në Prishtinë, ku gjatë kontrollit kanë gjetur dhe kanë konfiskuar 11 paketime të mbushura me substancë të dyshuar narkotike të llojit marihuanë me peshë 9374.1 gramë (9kg e 374.1 gr.).
Identiteti i personit të dyshuar është i njohur për policinë dhe njësitë relevante policore janë në kërkim dhe hetim të mëtutjeshëm të rastit. /tesheshi.com/
