Presidenti francez, François Hollande tha se një fitore e kandidatit presidencial republikan për Shtëpinë e Bardhë do të kthente rrjedhën e politikës botërore në të djathtë, por edhe se manjati i pasurive të paluajtshme i bën njerëzit “të duan të vjellin”.
Fitorja e mundshme e Trump në zgjedhjet e nëntorit mund të ketë ndikim edhe në zgjedhjet presidenciale franceze që mbahen në pranverën e vitit 2017, tha Hollande, i cili ende nuk ka bërë të ditur nëse do të kërkojë të rizgjidhet në detyrë.
“Nëse amerikanët zgjedhin Trump, kjo do të ketë pasoja, për shkak se zgjedhjet amerikane janë zgjedhje botërore”, tha ai.
“Mund të sjellin një kthesë shumë të fortë në të djathtë në botë, ose një korrigjim… fushata amerikane ka nxjerrë në pah çështje që do të reflektohen edhe në fushatën e zgjedhjeve në Francë”.
Presidenti socialist francez do të përballet me një konkurrencë të fortë nga e djathta ekstreme dhe liderja e Frontit Nacional, Marine Le Pen, nëse zgjedh të kandidojë sërish për postin e presidentit.
Hollande në komentet e veta theksoi se “teprimet” e Trump ishin të neveritshme.
“Teprimet e tij të bëjnë të duash të vjellësh, madje edhe në Shtetet e Bashkuara ndodh kjo, sidomos kur – si në rastin e Donald Trump, ai flet keq për një ushtar, për kujtimin e një ushtari”, tha ai, duke iu referuar komenteve shumë të kritikuara të Trump në ditët e fundit për kapitenin Humayun Khan, një ushtar muslimane amerikan që u vra në Irak në vitin 2004.
Presidenti Barack Obama e cilësoi Trump një ditë më parë, “të papërshtatshëm” për t’u bërë presidenti i Shteteve të Bashkuara mes një zemërimi të të gjitha palëve pas konfliktit që hapi kandidati republikan me prindërit e ushtarit Khan.
Hollande tha se ai po dëgjonte “komente lënduese e të poshtëruese” gjatë fushatës së zgjedhjeve amerikane. Duke folur për politikanët në përgjithësi, ai tha “ata duhet të respektohen kur janë të respektueshëm”.
Përgatiti: Juli Prifti – /tesheshi.com/
