Pas një Europiani të kurorëzuar me një sukses të konsiderueshëm për një skuadër debutuese, Shqipëria e nisi mbrëmë sezonin e ri futbollistik.
Tashmë jo një ekip i parë si i dosidoshëm, me objektiva shumë më të konsoliduara, për përfaqësuesen e Shqipërisë detyra nis e vështirësohet së tepërmi. Së pari, për të mos bërë hapa të gabuar, qoftë dhe në takime miqësore, e së dyti, për të mos e kthyer në rastësi suksesin e para disa muajve.
Miqësorja me Marokun ishte një takim tipik ku nuk duhej humbur. Edhe për t’i bërë një nisje të butë sezonit, por edhe për të mos e prishur atmosferën festive të inaugurimit të “Loro Boriçit”, të rikonstruktuar fund e krye.
Maroku është një skuadër e fortë, me lojtarë të njohur, e shumë e organizuar. Megjithatë, është një nga ato ekipe me të cilat barazimi është një prej rezultateve më të mundshme. Siç ngjau dhe mbrëmë, kur takimi përfundoi 0-0.
Fakti që De Biazi u shpreh i kënaqur nga ajo çfarë pa e çfarë eksperimentoi, tregon se italiani ka kërkuar më së paku të mos humbasë.
Ruajtja e energjive, shmangia e dëmtimeve, disa kolaudime të vogla të formacionit, i shkojnë për shtat një ndeshje kontrolli, siç qe pak a shumë ajo e së mërkurës.
Mungesa e Lorik Canës, tani e tutje e përhershme në fushë, shiriti i kapitenit në krah të Mavrajt, dhe rikthimi i Jahmir Hykës, ishin gjërat më spikatëse nga kjo miqësore. Pjesa tjetër u përket eksperimenteve të zakonshme në kësi rastesh.
Çfarë ka rëndësi është takimi pas disa ditësh me Maqedoninë. Rezultati 0-0 i miqësores ndaj Marokut është në funksion tërësisht të rezultatit që kërkohet ndaj maqedonasve.
Nuk mund të lihet pa përmenduar pakuptimësia e çmimit të lartë të biletave në këtë takim. Diçka krejt pa shije! Në kësi rastesh, ngado ka çmime simbolike të biletave, për t’i sjellë ndjekësit e futbollit në stadium. Këtu logjika funksionon ndryshe. Dhe sigurisht, çmimi i lartë i biletës shoqërohet me një tjetër çmim, po të hidhur: shkallët bosh të stadiumit në një pjesë të mirë të tij! /tesheshi.com/
