“Rezoluta e Këshillit të Sigurimit 1244 të Kombeve të Bashkuara është Bibla jonë. Ne jemi këtu në bazë të Rezolutës 1244 dhe ndërsa ajo është në fuqi, asgjë në thelb nuk do të ndryshojë”, ka thënë komandanti i KFOR-it, gjenerali italian Salvatore Cuoco.
Ai vlerësoi se situata e sigurisë në Kosovë është paqësore dhe e qëndrueshme dhe se nuk ka dallime të mëdha ndërmjet jugut dhe veriut të Kosovës në këtë drejtim.
“Nuk ka shenja apo prova të çdo lloj rreziku ose një incidenti të dhunshëm për çdo qytetar në Kosovë. Megjithatë, nëse ka ndonjë paralajmërim për shkelje të gjendjes së sigurisë, KFOR-i është i përgatitur për të marrë të gjitha masat që Kosova të jetë e sigurt”, ka thënë Cuoco për RTK 2.
I pyetur në lidhje me rastin e vrasjes së Oliver Ivanoviccit, ai ka thënë se KFOR-i nuk do të marrë pjesë në hetime, porse do ishte i gatshëm për ta bërë këtë, nëse kërkohet nga ky mision ushtarak.
“Ne mendojmë se është shumë e rëndësishme për të gjetur autorët e kësaj vrasjeje, për shkak se ajo është diçka që duhet të zgjidhet për sigurinë e tërë rajonit dhe se gjithashtu garanton zbatimin dhe funksionimin e ligjit dhe në veri të Kosovës”, ka thënë Cuoco dhe shtoi se do të ishte e nevojshme që Beogradi dhe Prishtina punojnë së bashku për të zgjidhur rastin. /tesheshi.com/
