Katër vitet e negociatave të ethshme mes qeverisë kolumbiane dhe rebelëve të FARC-ut kanë marrë fund në mënyrën më të mirë të mundshme, me arritjen e një marrëveshjeje paqeje historike.
Marrëveshja është deklaruar në kryeqytetin kubanez, ku dhe do të nisnin negociatat në nëntor të vitit 2012.
Kjo marrëveshje parashikon uljen e armëve nga rebelët e majtë dhe integrimin e tyre në jetën civile.
“Qeveria kolumbiane dhe FARC-u deklarojnë se kemi arritur një marrëveshje të plotë dhe përfundimtare mbi dhënien fund konfliktit dhe ndërtimin e një paqeje të qëndrueshme,” thuhej në një deklaratë të përbashkët, të lexuar nga diplomati kubanez Rodolfo Benitez.
Drejtuesi i delegacionit kolumbian, Humberto de la Calle, dhe kryenegociatori i FARC-ut, Ivan Marquez, e nënshkruan marrëveshjen në Kubë, në një ceremoni enkas për të.
“Nuk ka vend për fitues apo humbës kur arrin paqe nëpërmjet negociatave,” shkruajti në një rrjet social një prej negociatorëve të FARC-ut. “Kolumbia fiton, vdekja humbet!”
Marrëveshja do duhet të marrë dhe miratimin e kolumbianëve kur të votohet në një referendum në fillim të tetorit.
Pesë dekadat e konfliktit nisën në vitin 1964, kur FARC-u mori armët për të luftuar kundër pabarazisë ekonomike dhe shoqërore. 220.000 vlerësohet të jetë numri i viktimave nga konflikti i gjatë, me më shumë se pesë milionë njerëz të zhvendosur brenda vendit. /tesheshi.com/
