“Situata shumë e brishtë akuale në Irak lidhet në mënyrë të drejtpërdejtë me pushtimin e vendit nga Shtetet e Bashkura të Amerikës në vitin 2003, pushtim që u krye pa një mandat të Këshillit të Sigurimit të Kombeve të Bashkuara”. Kjo deklaratë është bërë nga ish-Sekretari i Përgjithshëm i OKB-së, Kofi Annan i cili ndenji në krye të organizatës nga viti 1997 deri në vtin 2006.
“Nuk mund ta shkëpusësh situatën aktuale sot në Irak nga pushtimi amerikan në vitin 2003, sepse ndër të tjera pushtimi shpërbëri edhe ushtrinë irakene, që ishte arma e Sadam Huseinit për të vendosur rend dhe pë të mbrojtur ligjin” – ka thënë Annan. Sipas tij, të gjitha strukturat e shtetit baathist u shpërbënë duke krijuar një vakum shumë serioz që ka çuar në situatën aktuale dhe se gjithçka është e qartë në këtë pikë. Ndër të tjera ai tha edhe se një nga dështimet më të mëdha të OKB-së ishte mosdhënia vendeve të vogla e një hapësire më të madhe për t’u shprehur në lidhje me çështjet ndërkombëtare si dhe paaftësia për të bërë përgjegjëse fuqitë e mëdha në lidhje me gabimet e tyre.
“Pas luftës në ish-Jugosllavi u tentua që të viheshin para përgjegjësisë persona dhe liderë dhe si pasojë u krijuan disa gjykata nga ajo për ish-Jugosllavinë, te Ruanda. Pati edhe disa vendime e dënime. Kemi ndërkohë dhe Gjykatën Ndërkombëtare Penale por ajo çka është interesante është fakti që fuqitë e mëdha nuk janë pjesë e saj.” – ka thënë Annan. Duke mos qenë pacifist ai është pro përdorimit të forcës, në raste të caktuara, por më tepër në formën e kërcënimit se sa si zgjidhje të konfliktit në vetvete. Për të, aktualisht, politika ndërkombëtare po degradon në sesin që disa lojtarë nuk kërkojnë negociata me kundërshtarët e tyre dhe se e minojnë arritjen e marrëveshjeve duke demonizuar qëllimshëm lojtarët e tjerë. /tesheshi.com/
