Prej disa ditësh, qarqe mediatike të LSI-së po vazhdojnë ta akuzojnë kryeministrin Edi Rama pas miratimit të ligjit të mbetjeve në parlament.
Ai ligj u miratua pa votën personale të Ilir Metës dhe Shpëtim Idrizit, por edhe të disa deputetëve të LSI-së dhe PDIU-së.
Qarqet mediatike pranë Ilir Metës e kanë sulmuar fuqishëm Ramën, duke e akuzuar se me ligjin e mbetjeve synon të sjellë në Shqipëri stoqe të rrezikshme, të administruara nga nëntoka e politikës botërore në Europë.
Është akuzë shumë e rëndë nëse shikohet nga vjen, dhe pa dyshim që ka një qëllim të caktuar.
Ndërkohë, Edi Rama dhe Ilir Meta, dy aleatët e qeverisjes, vazhdojnë të komunikojnë me kode, si vazhdimisht gjatë këtyre viteve, por me një sfond paksa ndryshe.
Deri para pak kohësh ishte Edi Rama që ngjitej thuajse në të njëjtën ditë të javës në zyrën e katit të tretë në kryesinë e Kuvendit, një veprim që shumë gazetarë e cilësuan si “detyrim paraqitjeje”. Ndërkohë, tani është e treta herë që ka ndryshuar kahja e këtij riti. Është pikërisht Ilir Meta që shkon në zyrën e Edi Ramës në kryeministri.
Ç’ka ndodhur?!
Edi Rama deklaroi në Kuvend të enjten se me Metën kanë folur për të “projektuar fitoren e 2017-s”.
Por kreu i Kuvendit nuk është prononcuar, madje as ndonjë zë nga LSI-ja, qoftë minor. Ka heshtje totale nga aleatja kryesore e PS-së, ndërkohë që gazetarë të cilët njihen për afërsinë milimetrike me Ilir Metën e kanë akuzuar rëndë Ramën se po sjell në Shqipëri “trenin e ferrit të mbetjeve toksike”.
Kurse këshilltari i afërt i Ilir Metës, Dritan Kaba, sulmon pa u ndalur dhe pa u zbutur ministrin e Brendshëm, Saimir Tahiri.
E gjithë kjo panoramë shton misterin dhe pikëpyetjet se çfarë ka ndodhur, e cili është sfondi i gjithë këtij dramatizimi absurd alla Samuel Becket.
Por një sinjal për t’i deshifruar të gjitha këto kode e jep ish-kryeministri Sali Berisha, i cili ka shkruar një status me të vërtetë shpërthyes.
Ndërsa po largohej nga Shqipëria, gjë që u bë e ditur nga portalet pranë liderit historik të PD-së, Berisha shkroi se Klement Balili, njeriu i fortë i LSI-së në Sarandë e Delvinë, ruhet me forca speciale dhe po tenton të pendohet tek organet greke.
Në fakt, prej kohësh është folur që Balili, i mbiquajturi “Eskobari i Ballkanit”, është kthyer në dëshmitar të drejtësisë, por jo të asaj shqiptare.
Një javë më parë, ambasadori amerikan në Tiranë përmendi DEA-n, agjencinë e SHBA-ve për luftën kundër drogës, se po punon ngushtë me autoritetet shqiptare dhe me vendet përreth për të kapur kapot e drogës.
Një lajm që tesheshi.com e ka botuar më shumë se dy javë më parë.
Në të njëjtën kohë, javën e shkuar u kap një skaf me tre tonë drogë në Itali, pronë e vëllezërve Poti, për të cilët u tha se janë pjesë e grupit të trafikut të Klement Balilit.
Duket se Delvina, vendbanimi i Balilit, po kthehet në epiqendrën e deshifrimit të një ekuacioni të vëshirë të lidhjes së botës shqiptare me krimin.
Që natyrisht ka lidhje me reformën në drejtësi dhe hetimet që priten, ndërkohë që kryeprokurori i Republikës largoi familjen nga vendi, e qarqe pranë mazhorancës po flasin për një largim të “butë” të tij. /tesheshi.com/
