Avokati i njohur Arianit Koçi, ka deklaruar se nuk pret që Gjykata Speciale do ta trondis skenën politike kosovare, ashtu siç po aludohet në media.
Koçi ka thënë se ndikimet politike në këtë process nuk do të mungojnë, por skena politike nuk do të tronditet ashtu siç po thuhet dhe flitet.
Në emisionin Alo, mirëmëngjesi të Radio Dukagjinit, Koçi është shprehur i bindur se edhe me Gjykatën Speciale UÇK-ja do të arrijë ta pastrojë emrin e vet, sikur në rastin Haradinaj.
“Fuqishëm besoj se UÇK-ja do ta pastrojë emrin e vet. Besoj se çdo ish-ushtar i UÇK-së, në këtë rast do të veprojë burrërisht sikur Ramush Haradinaj me Hagën dhe do të kthehet faqebardhë si z.Ramush Haradinaj”, deklaroi avokati i njohur kosovar.
Ai më tej ka thënë se nuk është pajtuar me këtë format të Gjykatës Speciale, meqë këtu gjykohen vetëm shqiptarët, përderisa botërisht dihet se krime kanë kryer serbët.
“Këtu gjykohen vetëm shqiptarët dhe krime dihet se kanë kryer serbët. Nuk isha pro kësaj gjykate në këtë format siç është”, theksoi Koçi. /tesheshi.com/
