Hakan Şükür dhe Arif Erdem, dy ish-futbollistë të njohur turq të viteve 2000, janë përjashtuar të dielën nga anëtarësia e klubit të Gallatasarajit për lidhje me FETÖ-n, organizatën përgjegjëse për përpjekjen e dështuar për grusht shteti në korrik të 2016-s.
Në një mbledhje të jashtëzakonshme, këshilli administrativ i një prej tre klubeve më të mëdha të Turqisë, vendosi për pezullimin e anëtarësisë së tyre vetëm një ditë pasi u refuzua të bëhej e njëjta gjë.
Në takimin e përvitshëm me anëtarët e klubit, të mbajtur të shtunën, do të kishte një varg përjashtimesh, por nuk do të ndodhte kështu për dy ish-lojtarët. Me ç’rast do të niste një furtunë reagimesh ndaj klubit të Gallatasarajit.
“Tradhtarët e vendit dhe të shtetit tonë nuk kanë punë në klubet tona sportive. Votimi i bordit është i pashpjegueshëm për familjet e dëshmorëve tanë,” do të deklaronte ministri turk i Rinisë dhe Sporteve, Akif Çağatay Kılıç.
Mes presionit dhe pakënaqësisë në rritje, klubi i Gallatasarajit i nxori dje dy ish-lojtarët jashtë radhëve të veta.
Hakan Şükür dhe Arif Erdem njihen si mbështetës haptas të Fethullah Gülen-it, njeriu për të cilin Turqia kërkon prej kohësh ekstradimin nga SHBA-ja. /tesheshi.com/
