Nga Bashkim Kastrati
Klinika e Pediatrisë e cila funksionin në kuadër të Qendrës Klinike Universitare të Kosovës tash e një kohë të gjatë ka mungesë të aparaturave të nevojshme për trajtimin e pacientëve.
Duke marrë parasysh natyrën e kësaj klinike dhe grupmoshat që marrin shërbime aty, kjo mungesë krijon vështirësi për mjekët në diagnostikimin dhe trajtimin e fëmijëve.
Drejtori i kësaj klinike, Muharrem Avdiu, ka thënë për REL se mungesa e buxhetit për klinikë, gjatë tërë vitit ka qenë evidente.
”Këtë vit nuk kemi pasur rastin të gëzohemi, pasi që QKUK-ja nuk ka investuar asnjë euro në Klinikën e Pediatrisë. Mungesa e aparaturave na shkakton problem, dhe kemi nevojë me u përcjellë në mënyrë të vazhdueshme, pasi që edhe numri i doktorëve të rinj është në rritje. Zakonisht analizat e nevojshme të fëmijëve kryhen në institucione private”, ka thënë doktor Avdiu.
Në lidhje me mungesën e aparaturave edhe Organizata Botërore e Shëndetësisë (OBSH)– zyra në Prishtinë, ka shprehur shqetësimin e saj.
Sipas kësaj organizate, mungesa e aparaturave është brengosëse, por qysh në vitin 2008 kur është përmbyllur faza emergjente e ndihmës së OBSH-së dhe organizatave tjera, nuk ka mundësi të mbështet me aparatura institucionet shëndetësore, sepse nuk është në përputhje me misionin e OSBH-së.
Ndryshe, Emiratet e Bashkuara Arabe tashmë kanë zyrtarizuar fillimin e planeve për ndërtimin e një qendre Pediatrie Kirurgjike në Prishtinë. Për ndërtimin e kësaj qendre do të dhurohen 22 milionë euro, dhe parashihet të hapet në verën e vitin 2017. Spitali sipas zyrtarëve kompetent do të jetë i pajisur me teknikë moderne.
QKUK ka nevojë për 60 milionë euro investime në aparatura
Shpend Fazliu, zëdhënës i Qendrës Klinike Universitare të Kosovës (QKUK) ka thënë për tesheshi.com se jo vetëm Klinika e Pediatrisë, por edhe klinikat tjera në QKUK, kanë nevoja të mëdha për aparatura.
“Bazuar në llogaritjet dhe përmbledhjet e kërkesave nga klinikat QKUK, por edhe spitalet tjera(7) në tërë Kosovën, rezulton se nevojat janë për 60 milionë euro për të përmbushur të gjitha kërkesat”, thotë Fazliu.
Ai thotë se QKUK për vitin 2016, ka vetëm 800 mijë euro buxhet për pajisje mjekësore, buxhet ky që këtë vit e menaxhon Ministria Shëndetësisë.
“QKUK, është duke përgatitur prioritetet për furnizim, përfshirë edhe Klinikën e Pediatrisë, pra do bazohemi në furnizim me kërkesa emergjente të domosdoshme për punë, ngase furnizimi i plotë nuk ka mundësi të bëhet me buxhetin aktual”, theksoi Fazliu.
Krijimi i kushteve të mira në Klinikën e Pediatrisë ka rëndësi të madhe edhe për parandalimin e vdekshmërisë së fëmijëve. Sipas drejtuesve të kësaj klinike, vdekshmëria e fëmijëve ka shënuar rënie ndër vite. Në nivel të repartit intensiv vdekshmëria është rreth 4 për qind, derisa 0.7 për qind në nivel klinike. Për shembull në vitet e 90-ta ka pasur 10 raste të vdekjes së fëmijëve brenda 24 orësh.
Sidoqoftë edhe cilësia e shërbimeve shëndetësore në Klinikën e Pediatrisë në Qendrën Klinike Universitare, si qendër referente për tërë Kosovën, nuk duket të jetë në nivel të kënaqshëm, ndonëse po shënon ngritje, deklarojnë zyrtarë shëndetësorë. /tesheshi.com/
