Mirra që do të përdoret në ceremoninë e kurorëzimit të mbretit britanik Charles III është shenjtëruar në Jerusalem, duke pasqyruar lidhjet e monarkut britanik me Tokën e Shenjtë, njoftoi të premten Pallati Buckingham.
Patriarku i Jeruzalemit Theophilos III dhe kryepeshkopi i Kishës Anglikane në Izrael Hossam Naum shenjtëruan mirrën në Kishën e Ngjalljes, thuhet në njoftim.
Mbreti Charles do të vajoset me mirrën e shenjtë gjatë ceremonisë së kurorëzimit në Westminster Abbey më 6 maj. Sipas ritualit, monarku britanik do të lyejë me mirrë duart, kokën dhe gjoksin e tij.
Për përgatitjen e mirrës u mblodhën vajra nga dy ullishte në Malin e Ullinjve: Manastiri i Shenjtë i Zonjës dhe Kisha e Maria Magdalenës (ku gjenden eshtrat e gjyshes së Karlit, Princeshës Alice).
Kreu i Kishës Anglikane, Kryepeshkopi i Canterbury-t Justin Welby, i cili do të shërbejë në kurorëzimin e mbretit Charles, tha se origjina e mirrës pasqyronte “lidhjen historike midis kurorëzimit, Biblës dhe Tokës së Shenjtë”. “Që nga mbretërit e lashtë e deri më sot, monarkët morën vajosjen me mirrë nga Toka e Shenjtë”, nënvizoi ai.
Mirra, me vajra esenciale të trëndafilit, jaseminit, bergamotit, portokallit, myshkut, susamit dhe kanellës – është e ngjashme me atë të përdorur në kurorëzimin e Mbretëreshës Elizabeth II 71 vjet më parë. /tesheshi.com/
