Një rrëmbim i papritur i Realit të Madridit pak para nisjes së minutës së 80-të, kërcënime të njëpasnjëshme të portës kundërshtare, më pas kartoni i kuq i Ramosit, e kur duket se gjithçka mbaron, Ronaldo shënon!
Një dominim i çuditshëm në fundlojë i madrilenëve, a thua se Barça nuk ekzistonte më në fushë. Dhe goli që ndjehej qartas se ishte afër.
Barcelona harroi të luajë, duke ia lënë kundërshtarit atë që e ka më për zemër në çdo ndeshje: mbajtjen e topit.
Luis Enrike bëri një ndërrim të vetëm gjatë gjithë lojës, duke nxjerrë Rakitiçin në minutën e 74-t e duke futur Arda Turanin. Ky duket se është momenti kritik që ktheu përmbys gjithçka. Duke kërkuar t’i japë më fantazi sulmit, Enrike çbalancon mesfushën me ndërrimin e tij. Dhe gjithçka vjen më pas.
Reali fitoi 1-2 e u dha fund 39 ndeshjeve pa humbje të katalanasve. Me një Navas spektakolar në portë, që nuk lë rast pa bërë akrobaci në pritjet e tij, me një Kasemiro që ka rol kyç në fitoren e mbrëmshme historike, e me treshen vrasëse të sulmit.
Benzema shënon një gol ekzemplar, si për t’i dhënë përgjigje dhe lojës së pistë që po i bëhet për ta mbajtur jashtë kombëtares franceze, Bejl ngrihet gjigandshëm mbi mbrojtësin kundërshtar dhe e çon topin në rrjetë me kokë, por gjyqtari vendos ndryshe, duke ia anuluar golin. E portugezi Ronaldo e ruan dhuratën e tij për në fund, pasi nuk kishte patur asnjë lloj ndikimi në lojën e të tijve gjatë gjithë ndeshjes. Një gol që vlen shumë për kthimin e historisë.
Barcelona nuk u duk asnjëherë në 60 minutat e para se mund të humbiste. Edhe pse Messi nuk ishte ai i zakonshmi, katalanasit ngjanin shumë më argëtues. Goli i Pikesë në minutën e 56-të ishte përfundim logjik i presionit të vazhdueshëm. Vijimësi e prishur krejt papritur nga goli i barazimit, i ardhur pas një sulmi sporadik të miqve. E 62-ta minutë, kur Benzema vendosi barazpeshën në fushë, u bë dhe nisja e triumfit të Realit. Për t’u përmbyllur me golin e Ronaldos pesë minuta para mbarimit të lojës.
Me një lojtar më pak, me dhjetë pikë më pak në klasifikim, me një trajner pa përvojë, që e ka El Clasico-n për herë të parë, e përballë 99.264 mbështetësve të katalanasve në “Camp Nou”, madrilenët bëjnë mrekullinë, duke u kthyer vendasve reston për humbjen e thellë të fazës së parë në Madrid.
Kampionati i hapur? Lëkundet Barcelona? Asgjë më e sigurtë?
Këtë do ta mësojmë pas së martës, kur Barcelonës do i duhet të përballet dhe me Atletikon e Madridit në çerekfinalet e Champions League-s. Ndaj një Atletikoje që po dje fitoi 5-1 ndaj Real Betisit.
E në i rrëshqittë loja dhe rezultati dhe ndaj Atletikos, La Liga do të jetë krejt ndryshe në javët në vijim. /tesheshi.com/
