Ish-sekretari amerikan i Shtetit, Henry Kissinger, i bëri thirrje komunitetit ndërkombëtar që të vazhdojë të mbështesë Ukrainën deri në arritjen e armëpushimit, ndërkohë që ai mbrojti pranimin e vendit në NATO.
Duke folur përmes video-lidhjes në Forumin Ekonomik Botëror në Davos, Zvicër, Kissinger tha: “Para kësaj lufte, unë isha kundër perspektivës së anëtarësimit të Ukrainës në NATO, sepse kisha frikë se do të shkaktonte pikërisht atë që shohim tani.”
Megjithatë, me kushtet e sotme, ai theksoi se “neutraliteti” i Ukrainës është i pakuptimtë dhe shtoi se “anëtarësimi i Ukrainës në NATO do të ishte i përshtatshëm” pasi të zgjidhet konflikti.
99-vjeçari Kissinger theksoi gjithashtu se duhet bërë gjithçka që është e mundur për të parandaluar një konflikt frontal ushtarak midis Perëndimit dhe Rusisë dhe për të ruajtur kanalet e komunikimit me Moskën për t’i dhënë asaj një shans për t’u bashkuar me sistemin ndërkombëtar pasi të arrihet një marrëveshje paqeje.
“SHBA-ja ka mbështetur rezistencën ukrainase, ajo duhet të vazhdojë ta mbështesë atë dhe, nëse është e nevojshme, të rrisë ndihmën ushtarake derisa të arrihet një armëpushim ose të bihet dakord për të mbajtur bisedime paqeje,” tha diplomati i lartë amerikan në pension. /tesheshi.com/
