Kissinger: Faji për konfliktin në Ukrainë është i BE-së, vuri kushte pa marrë në konsideratë pasojat

Ish-sekretari amerikan i Shtetit, Henry Kissinger kritikon politikat amerikane dhe ato europiane në Ukrainë, duke thënë se ato po injorojnë marrëdhëniet e Rusisë me fqinjën e saj dhe apelon për bashkëpunim midis Shtëpisë së Bardhë dhe Kremlinit.

“Thyerja e Rusisë është shndërrruar në një objektiv për zyrtarët amerikanë ndërsa qëllimi afatgjatë duhet të jetë integrimi i saj”, tha diplomati amerikan 92-vjeçar në një intervistë të gjatë me “The National Interest” për problematikën më të ndjeshme botërore.

“Nëse ne e trajtojmë Rusinë seriozisht si një fuqi të madhe, ne kemi nevojë që në fillim të përcaktojmë nëse shqetësimet e tyre mund të pajtohen me nevojat tona”, thotë ai.

Diplomati që është më së shumti i famshëm se shërbeu në administratën e presidentit Nikson gjatë së cilës mori edhe çmimin Nobel për Paqe, për negociimin e armëpushimit në Vietnam, akuzoi Perëndimin se po dështon të ndërgjegjësohet për kontekstin historik në të cilën ndodhi konflikti midis Moskës dhe Kievit.

“Marrëdhëniet mes Ukrainës dhe Rusisë do të jenë gjithnjë të një karakteri të veçantë në mendjen ruse. Nuk mund të limitohen vetëm në marrëdhënien midis dy shteteve sovrane, jo në pikëvështrimin rus, ndoshta edhe në atë të vetë Ukrainës. Kështu, ajo që ndodh në Ukrainë nuk mund të formulohet thjesht, duke aplikuar parimet që funksionojnë në Europën Perëndimore”.

Kissinger fajëson Bashkimin Europian për nxitjen e konfliktit në dyert e veta, në Ukrainë, kur propozoi marrëveshje tregtare me këtë vend në vitin 2013, pa marrë në konsideratë se një gjë e tillë do të tjetërsonte Moskën dhe do të ndante popullin ukrainas.

“Gabimi i parë ishte sjellja e pakujdesshme e Bashkimit Europian. Ata nuk kuptuan implikimet e disa kushteve që vendosën. Politikat e brendshme të Ukrainës bënin të dukej e pamundur që ish-presidenti Yanukovych të pranonte kushtet e BE-së dhe të rizgjidhej apo që Rusia t’i shihte këto kushte si thjesht ekonomike”, thotë Kissinger.

Konflikti në Ukrainë, që kulmoi me aneksimin e Krimesë, vijon ende në zonat lindore të vendit, Donjeck e Luhansk të cilat janë në kontrollin e separatistëve prorusë. /tesheshi.com/