Rrëzimi i koalicionit qeverisës në Greqi mund të vonojë zbatimin e reformave që shoqërojnë paketën e tretë të ndihmës për Greqinë, por në terma afatgjatë mund të sjellë më shumë stabilitet politik për zbatimin e tyre, shumë I nevojshëm, thonë analistët.
“Qeveria e qëndrueshme nevojitet për të zbatuar masat e kursimit dhe ka një shans të mirë për atë që do të dalë fitues nga zgjedhjet”, tha Christian Dembik, ekonomist në Saxo Banque, duke shtuar: “Ka një mbështetje të gjerë e popullore për menaxhimin nga ana e qeverisë greke të paketës”.
Kryeministri Aleksis Cipras dha dorëheqjen mbrëmjen e së enjtes dhe kërkoi zgjedhje të parakohshme.
Agjencia e klasifikimit Moody’s paralajmëroi për shtimin e rrezikut të borxhit për Greqinë, si rezultat i këtyre lëvizjeve. “Pagesat e ardhshme të borxhit mund të jenë me vonesë”, tha Moody’s.
Kreditorët e Greqisë, sidoqoftë, kanë një vështrim më optimist. “Kam parasysh mbështetjen e plotë në parlamentin grek për programin e ri dhe paketën e reformave dhe shpresoj se zgjedhjet do të sjellin edhe më shumë mbështetje për qeverinë e re”, tha kreu I eurogrupit, Jeroen Dijsselbloem.
Tashmë, mandatin për formimin e qeverisë e kanë konservatorët e Demokracisë së Re e në momentin e dështimit të tyre edhe Agimi i Artë, partia neonaziste. Pavarësisht përpjekjeve të tyre, nuk pritet që të kenë sukses në ndërtimin e një koalicioni qeverisës.
Vetë Cipras mbetet politikani më popullor në Greqi me mbështetjen që rezulton deri në 61 për qind.
Analistët presin që Cipras të formojë një qeveri të re me elementë të partive opozitare që do të zëvendësojnë largimin e krahut rebel të Syriza-s. /tesheshi.com/
