Kisha serbe në oborrrin e Universitetit të Prishtinës, është kthyer këto ditë në qendër të debatit politik në Kosovë. Pas kaq vitesh, segmente të shoqërisë kosovarë janë kujtuar për objektin e papërfunduar të kultit orodoks serb në zemër të kryeqytetit, ngacmuar dhe nga fakti që Serbia nuk po e ndal betejën e saj kundër Kosovës së pavarur.
Kisha është ndërtuar gjatë kohës së regjimit të Millosheviçit, dhe është parë si një investim serb për ta identifikuar gjithnjë Kosovën si tokë serbe. Vetëvendosje thotë se ndërtimin e saj e ka financuar vetë famëkeqi Arkan, por disa segmente pushteti në Kosovë thonë se ajo duhet të ekzistojë në shërbim të besimtarëve ortodoksë.
Sakaq, ndërkombëtarët ende nuk e kanë thënë fjalën e tyre mbi objektin fetar serb, por ajo çfarë nuhatet është se edhe ata nuk janë për cënimin e saj, në kuadër të një politike që “i merr me të mirë serbët”, siç ka ndodhur që pas përfundimit të luftës e deri më sot.
Ndërkohë, një rast të ngjashëm paraqet edhe kisha ortodokse në krah të xhamisë në qendër të Ferizajt, që për më tepër thuhet se është ndëtuar mbi tokë vakf, pronë e xhamisë. Kundërshtuesit e kishës në oborrin e universitetit, ku dhe studentët përbëjnë një zë të fortë, e bëjnë këtë edhe me pretendime tokësore. Ata thonë se kisha është në tokën e universitetit, e për këtë arsye duhet larguar që aty. /tesheshi.com/
