Kimisti, i cili pretendon të ketë qenë i përfshirë në një program të fshehtë sovjetik në të cilin ishte zhvilluar i “Novichok”-u, pra agjenti i famshëm nervor, i kërkoi falje Alexei Navalny-it, i cili, sipas mjekëve gjermanë, u helmua pikërisht nga ky helm i fuqishëm.
“Unë i kërkoj ndjesë thellë Navalny-it për pjesëmarrjen në këtë ndërmarrje kriminale që rezultoi në zhvillimin e një substance toksike që e helmoi atë,” tha Vil Mirzajanov në një intervistë me një kanal opozitar në Rusi.
Shkencëtari, i cili tani jeton në Shtetet e Bashkuara, ishte i pari që zbuloi ekzistencën e “Novichok”-ut në artikuj të botuar në fillim të viteve 1990.
Pasi u sëmur në një fluturim brenda Rusisë më 20 gusht, Alexei Navalny u shtrua në një spital të Berlinit, ku ai ende po trajtohet nga pasojat e helmimit me këtë helm nervor. Testet toksikologjike të gjakut të politikani rus të kryer në një laborator ushtarak gjerman, siguruan “prova të pakundërshtueshme” se ai ishte helmuar me “Novichok”.
Moska vazhdon të përjashtojë një mundësi të tillë, megjithë gjetjet dhe provat e shkencëtarëve nga laboratorët gjermanë, francezë dhe suedezë.
“Navalny do të duhet të jetë shumë i durueshëm, por në fund ai do të shërohet,” tha Vil Mirzajanov, duke parashikuar shërimin e tij të plotë në “rreth një vit”.
Ai beson se Navalny ndoshta e gëlltiti helmin, e për këtë arsye nuk i rrezikoi njerëzit e tjerë.
Në të kundërt, një shkencëtar tjetër i përfshirë në krijimin e “Novichok”-ut, Vladimir Uglev, u tha hetuesve rusë se fakti që Navalny mbijetoi tregoi se ai kishte rënë në kontakt me helmin përmes lëkurës dhe nuk e kishte gëlltitur atë. /tesheshi.com/
