Ambasadorja Yuri Kim tha se amerikanët dhe shqiptarët qëndrojnë krah për krah me njëri-tjetrin, në një mesazh në nisjes së stërvitjes më të madhe ushtarake në Evropë, “Defender Europe 23”, trupat e e cilës u shfaqën te sheshi “Nënë Tereza”.
“Jemi këtu si aleatë, miq dhe partnerë. Amerikanët dhe shqiptarët qëndrojnë krah për krah sikurse e thoni ju. Dikur të ndarë veçmas, tani aleatë të NATO-s dhe partnerët më të afërt ushtarakë”, tha ajo, duke cituar Skënderbeun, për të cilin tha se e ka hero personal.
“Nuk mund të mos kujtoj fjalët e Skënderbeut, Heroi Kombëtar të Shqipërisë dhe madje heroi im vetjak ‘Bashkimi bën fuqinë’”.
Nga ana tjetër, kryeministri Rama potencoi dhe njëherë një tezë fushate.
“Shqipëria nuk ka qenë kurrë më lart në nivelin e respektit ndërkombëtar dhe sot, e ulur në tryezën e Këshillit të Sigurimit krah për krah me SHBA-të si bashkëpenëmbajtëse për çështjen e Ukrainës, ajo merr një profil dhe një rol, që jo vetëm e ngarkon me përgjegjësi të jashtëzakonshme, por edhe e vë në dukje se çfarë përparimi dhe çfarë pjekurie ka arritur vendi ynë”, theksoi i pari i qeverisjes shqiptare. /tesheshi.com/
