Pas 10 ditëve të para në Shqipëri, ambasadorja e re amerikane Yuri Kim, e ka qartësuar tashmë se vijimi i Reformës në Drejtësi deri në finalizim, si proces dhe si produkt, është misioni kryesor i axhendës së saj diplomatike.
“Kam vetëm 9 ditë këtu dhe janë takuar me të gjithë përfaqësuesit kryesor të politikës. Ishin takime mjaft të rëndësishme dhe domethënëse. Në të gjitha takimet është theksuar rëndësia e Reformës në Drejtësi për t’i dhënë fund korrupsionit. Reforma në Drejtësi do të sigurojë kapacitetet e duhura ekonomike dhe demokratike të Shqipërisë. Ju keni në dorë të ardhmen dhe shpresën e popullit shqiptarë. SHBA ka qenë gjithmonë krah Shqipërisë në moment kritike dhe Reforma në Drejtësi dhe zbatimi i saj është një nga këto momente”, tha Kim në një aktivitet kushtuar kësaj reforme, me qeveritare e drejtues institucionesh.
Nga ana tjetër, kolegu i saj Soreca, ambasador i BE-së, kujtoi dhe njëherë se Reforma në Drejtësi është gjithashtu një investim europian dhe në terma financiarë.
“BE mbështet Reformën në Drejtësi dhe është angazhimi politik dhe financiar më i madh i saj në vend. Kjo është e vetmja mënyrë për të krijuar një Shqipëri demokratike dhe stabël si pjesë të BE. Këto vitet kanë qenë intensive që kanë kërkuar nerva çeliku nga të gjithë”, tha Soreca.
Siç mund të kuptohet, këto mesazhe shkojnë për atë pjesë të politikës që prej ndërkombëtarëve është kuptuar se kanë për qëllim pengimin sa më shumë të implementimit të reformës apo suksesit të saj.
Kujtojmë se kohë më parë, për Reformën në Drejtësi punuan fuqishëm ish-ambasadorët Lu e Vllahutin, një dyshe e cila u përballë me shumë paragjykime, sulme e deri dhe akuza, pa llogaritur shpotitjet e shumta. Tashmë ato po pasohen nga Kim dhe Soreca, në të njëjtin pozicion, me të njëjtin mision. /tesheshi.com/
