Është rithyer Kiço Blushi me analizën e tij të munguar prej disa vitesh.
I njohur për stilin e veçantë dhe qasjen krejt të ndryshme nga i biri Ben, shkrimtari Kiço Blushi kishte një fushëvështrim më gjithëpërfshirës dhe aspak provokator të shtrimit të argumenteve në lëmin e debatit publik.
Por sot, në rikthimin e tij në një portal pranë të birit dhe opozitar me Ramën, Kiço sulmonte fort kryeministrin duke mbrojtur edhe kauzën e partisë së re që drejtohet nga i biri.
Nuk ka asnjë të keqe në opozitarizmin e Kiço Blushit e askujt, as në sulmin ndaj Ramës, por ky rikthim i publiçistit Kiço Blushi me një guhë agresive ngjau pak jo e natyrshme për traditën që ka krijuar ai prej 20 vitesh në tregun mediatik, kur edhe në kohët më të tensionuara në vend, ai shkruante i qetë dhe pa tone të larta.
Ja ç’shkruan ai sot: “Teksa e dëgjoja ligjëratën e tij më lindi pa dashur një pyetje naive. Po sikur Bankersi të kërkonte e të nxirte naftë në Surrel dhe jo në Zharrëz dhe familja e Ramës, Zahoja i vogël të detyrohej të jetonte mbi një tokë të djerëzuar, të bombarduar nga shpërthimet e përditshme, të thithte gaz helmonjës, të pinte ujë të ndotur, të dridhej nga tërmetet e të jetonte me frikën e paniktë të shëmbjes së shtëpisë… A do të fliste vallë Rama ashtu si foli? A do të justifikonte koncesionin, duke ia hedhur fajin qeverisë së mëparshme, a thua se ai vetë është duarjashtë e gjendet hala në opozitë, pra nuk po bën katër vjet në krye të qeverisë, me gjithpushtetshmëri që do t’ia kishte zili edhe Berisha i parë? A do të justifikonte Bankersin dhe a do të mjaftohej me akuzën se këtë katrahurë e pat bërë qeveria e mëparshme? Afërmendsh nuk do të fliste kështu.21 Janari do të përsëritej me siguri, ndoshta dhe më fort”.
Kiço Blushi ka qenë prej vitesh anëtar i Këshillit Bashkiak të Tiranës në grupin e PS-së, në kohën sa Bashkia drejtohej nga Rama. Por ndryshimi i qëndrimeve politike të të birit ka ndikuar dhe tek ai. Pak muaj më parë, në një protestë të shoqërisë civile për importin e mbetjeve, ai u pa aty së bashku me aktorin Robert Ndrenika. /tesheshi.com/
