Udhëheqësi suprem i Iranit, Ayatollah Ali Khamenei, tha se SHBA duhet të tërhiqet nga rajoni dhe shtoi se sulmi raketor i Teheranit ndaj objektivave amerikane në Irak ishte një “shuplakë në fytyrë” për Amerikën.
“Veprimi ushtarak si ky nuk është i mjaftueshëm. Ajo që është e rëndësishme është t’i jepet fund pranisë së korruptuar të Amerikës në rajon”, tha Khamenei në një fjalim të transmetuar nga televizioni shtetëror, duke përjashtuar çdo vazhdim të bisedimeve me Uashingtonin për marrëveshjen bërthamore të 2015-ës.
Khamenei gjithashtu tha që SHBA po përpiqet të eliminojë lëvizjen libaneze Hezbollah për të ndihmuar Izraelin.
Irani gjuajti më shumë se dhjetë raketa në dy baza ushtarake amerikane në Irak, konfirmoi Pentagoni. Mediat irakiane raportuan se të paktën 80 amerikanë u vranë në sulm.
Raketat u qëlluan në bazën Ain al-Asad në provincën Anbar dhe në bazën e Erbilit të mërkurën herët.
Sulmi iranian erdhi pasi forcat amerikane vranë gjeneralin iranian Qassem Soleimani në një sulm ajror javën e kaluar, pas urdhrave të Presidentit Donald Trump.
Presidenti iranian Hassan Rouhani tha se Uashingtoni mund t’i ketë “prerë dorën” Iranit me vrasjen e gjeneralit, porse nga ana tjetër, një “këmbë amerikane” do të pritej në rajon, raporton Rretuers. /tesheshi.com/
