Komandanti i Komandës së Forcave të Përbashkëta të NATO-s në Napoli, Admirali Stuart Munsch, ka deklaruar se përfundimi i ngjarjeve në fshatin Banjskë të 24 shtatorit, në veri të Kosovës, mund të ishte shumë më keq.
Në konferencën për media pas dorëzimit të detyrës, ai tha se ishte mirë që atë ditë nuk kishte civilë të lënduar, ndonëse në afërsi ishin 40 të tillë.
“Plus ata që jetojnë në manastir (Banjska). Ndërtesa fetare ishte gjithashtu e mbrojtur në mënyrë adekuate. Dhuna u ndal relativisht shpejt. Ajo u përmbajt dhe nuk u përhap. Funksionet që përshkrova, ku policia e Kosovës është e para që përgjigjet, EULEX-i i dyti dhe KFOR-i i treti, u respektuan. Pavarësisht rrethanave shumë të vështira, mendoj se të trija organizatat qëndruan shumë mirë”, tha Munsch.
I pyetur nëse do t’i përgjigjet kërkesës së presidentit serb Aleksandar Vuçiç që misioni i KFOR-it të marrë përsipër sigurinë në veri të Kosovës, ai thekson se përgjegjësinë e ka para së gjithash policia e Kosovës.
“Ata janë të parët që përgjigjen dhe është detyra e tyre të sigurojnë situatën e sigurisë. Ata janë të mbështetur nga EULEX-i, i cili është i dyti në zinxhirin e reagimit dhe vetëm atëherë ndërhyn KFOR-i, nëse nuk janë të aftë”, tha Munsch në konferencën për media pas ceremonisë së dorëzimit të detyrave komanduese në komandën e KFOR-it në Prishtinë.
Ambasadorja e SHBA-së në NATO, Julianne Smith deklaroi se Aleanca insiston për deeskalim në Kosovë, duke thënë se aleatët po monitorojnë situatën në Ballkanin Perëndimor.
“Ne jemi të shqetësuar për rritjen e paqëndrueshmërisë dhe dhunës”, tha ajo në një konferencë për shtyp online dhe shtoi se kjo është arsyeja pse KFOR-i ka vendosur të rrisë praninë e trupave të tij në Kosovë.
Ajo ka theksuar se e vetmja mënyrë për të dalë nga situata aktuale është dialogu ndërmjet Kosovës dhe Serbisë, me ndërmjetësimin e Bashkimit Evropian.
“Ne do të vazhdojmë të monitorojmë situatën në rajon dhe të këmbëngulim për de-përshkallëzimin”, tha Smith. /tesheshi.com/
