Këshilli Organizativ për rivarrimin e Isa Boletinit sot ka mbajtur mbledhjen e radhës, ku është vendosur përfundimisht që eshtrat e heroit të rivarrosen në vendlindje me 10 qershor.
Këtë për Veriu.info e ka konfirmuar kryetari i komunës së Mitrovicës, Agim Bahtiri, i cili tha se këshilli në mënyrë unanime e ka vendosur një gjë të tillë.
“Sapo dola nga mbledhja e këshillit, ku në mënyrë unanime është vendosur që rivarrimi i Isa Boletinit të bëhet në Boletin, siç ishte planifikuar më herët. Pra, është shfuqizuar vendimi i mbledhjes së kaluar të këshillit, ku ishte vendosur që heroi Isa Boletini të rivarroset në Vlorë, e ku unë e kisha kundërshtuar fuqishëm një gjë të tillë”, tregon Bahtiri për Veriu.info.
I pari i Mitrovicës bënë të ditur se në këshill është vendosur që secili institucion t’i merr përgjegjësitë e veta dhe rivarrimi me 10 qershor të kryhet në mënyrën më të mirë të mundshme.
Agim Bahtiri ia kërkon Ambasadorit malazez koburen e Isa Boletinit
Kryetari i komunës së Mitrovicës, Agim Bahtiri, kërkoi sot nga ambasadori i Malit të Zi në Kosovë, Radovan Miljaniq, që autoritetet e Podgoricës ta kthejnë në Kosovë koburen e heroit kombëtar shqiptar, Isa Boletini.
Këtë kërkesë, Bahtiri e ka bërë gjatë takimit me diplomatin malazez sot në Mitrovicë.
“Kërkova prej tij që të bëjë të pamundurën qe të na sjellë koburen e Isa Boletinit e cila gjendet në Mal të Zi”, tha Bahtiri.
Isa Boletini dhe disa anëtarë të familjes së tij janë vrarë në vitin 1916 afër Podgoricës.
Ai ka qenë i varrosur në këtë qytet deri në vitin 1998 kur një grup i aktivistëve shqiptarë të Kosovës i tërhoqën eshtrat e tij dhe i sollën në Kosovë.
Por ambasadori Miljaniq nuk komentoi kërkesën e Bahtirit, por u fokusua më shumë në rritjen e bashkëpunimit ekonomik.
“Marrëdhëniet politikë ndërmjet Malit të Zi dhe Kosovës janë të mira, por në çfarëdo mënyre, bashkëpunimi ekonomik është i mangët dhe mund të jetë më i mirë dhe më gjithëpërfshirës”, tha Radovan Miljaniq, raporton kallxo.com
Mitrovica është duke bërë përgatitje për rivarrimin e eshtrave të Isa Boletinit më 10 qershor në vendlindjen e tij në Boletin.
