Deklaratat polemizuese të kandidatit republikan për president në SHBA, Donald Trump-it, në lidhje me ndalimin e muslimanëve që të hyjnë në vendin e tij gjersa të shihet se ç’po ngjet, vijojnë të marrin përgjigje të ashpra.
I tillë ka qenë reagimi i udhëheqësve arabë të Gjirit Persik, që i dënon si raciste dhe armiqësore deklarimet kundër refugjatëve sirianë dhe muslimanëve, por pa i specifikuar ato.
Këshilli i Bashkëpunimit të Gjirit Persik shprehet kësisoj, “Këshilli suprem shprehu shqetësimin e vet të thellë për rritjen e retorikës armiqësore, raciste dhe johumane kundër refugjatëve në përgjithësi dhe muslimanëve në veçanti.”
Dënimi i kësaj retorike zuri një vend të rëndësishëm në komunikatën përfundimtare të takimit të 36-të të Këshillit të Bashkëpunimit të Gjirit Persik, të mbajtur në Riad.
Në komunikatë kërkohet gjithashtu dhënia e mbrojtjes së nevojshme për refugjatët që po i ikin zjarrit të dyfishtë të sundimit të padrejtë dhe të grupeve terroriste.
Trump-i dhe kandidatët e tjerë republikanë për president kanë kërkuar veprim për ta frenuar ardhjen e refugjatëve në SHBA dhe kanë bërë komente kundër bashkësisë muslimane në vend. /tesheshi.com/
