Është mirë që suedezët janë të përgatitur mendërisht për luftë, tha pak ditë më parë admirali Rob Bauer, kreu i Komitetit Ushtarak të NATO-s. Bauer i kërkoi sektorëve publikë dhe privatë në Perëndim që të përgatiten për një periudhë në të cilën çdo gjë mund të ndodhë në çdo kohë, duke përfshirë luftën.
“Ne kemi nevojë për një transformim të NATO-s gjatë kohës së luftës,” tha admirali holandez të mërkurën në hapjen e një takimi dy-ditor të ministrave të mbrojtjes të NATO-s në Bruksel.
Ai theksoi se qeveritë dhe kompanitë nga Aleanca jetonin në një epokë ku gjithçka ishte e bollshme, gjithçka ishte e parashikueshme dhe gjithçka mund të kontrollohej.
“Anëtarët e NATO-s duhet të përshtaten nga pushtimi rus në 2022 në një epokë në të cilën çdo gjë mund të ndodhë në çdo kohë, një epokë në të cilën ne duhet të presim të papriturën, në të cilën ne duhet të fokusohemi te efektiviteti në mënyrë që të jemi vërtet efektivë”, tha Bauer.
Gjatë konferencës të së enjtes, duke iu përgjigjur pyetjes së një gazetari për deklaratat e fundit të liderëve suedezë, admirali tha se është mirë që suedezët të përgatiten mendërisht për luftë.
“Duhet të keni ujë në shtëpi, një radio me bateri dhe një elektrik dore me bateri që të funksionojë për ditët e para. Këto janë bazat. Nuk po them se gjërat do të shkojnë keq nesër, por ne nuk mundemi të jemi të sigurt se paqja do të zgjasë përgjithmonë. Kjo është arsyeja pse ne kemi plane mbrojtëse”, tha Bauer. /tesheshi.com/
