Kërkues nga Universiteti Hebre i Jerusalemit pretendojnë se presidenti i Autoritetit Palestinez, Mahmoud Abbas, ka qenë agjent i KGB-së ruse në fillim të viteve 1980.
Gideon Remez dhe Isabella Ginor kanë thënë se dokumenti, në një arkiv në Universitetin e Kembrixhit, tregon se Mahmoud Abbas ishte agjent i KGB-së gjatë kohës që jetonte në Damask të Sirisë.
Pretendimi i dy kërkuesve u bë i njohur një natë më parë në televizionin publik izraelit.
Zëdhënësi i Mahmoud Abbas-it, Nabil Abu Rudeineh, e ka quajtur gjithçka si shpifje.
“Eshtë e qartë se Izraeli ndjehet i shqetësuar nga marrëdhënia strategjike (e palestinezëve) me Rusinë, e nga qëndrimi i qartë dhe i deklaruar rus, që është për zgjidhjen e konfliktit izraelito-palestinez në bazë të një shteti të pavarur palestinez dhe të drejtës për vetëvendosje për popullin tonë,” ka deklaruar zëdhënësi i Abbas-it.
Sipas zëdhënësit palestinez, me këtë shpifje synohet të nxirret nga shinat iniciativa ruse për paqe, e cila parashikon një takim të drejtpërdrejtë midis Abbas-it dhe Netanyahu-t. /tesheshi.com/
