Një terapi e re eksperimentale ka arritur atë që ka dështuar ta bëjë kimioterapia dhe transplanti i palcës kurrizore: të drejtojë kanceret kronike apo ato që rikthehen edhe më të rrezikshme, në rrugën e përmirësimit.
Për më tepër, terapia përdor sistemin natyral të mbrojtjes së trupit për të sulmuar tumoret kanceroze.
Trajtimi përfshin qelizat T, një tip qelizash imunitare që funksionojnë tek trupi i njeriut si njësitë e ndërhyrjes së shpejtë, për të pikasur, rrethuar e shkatërruar pushtuesit e huaj qofshin bakterie apo viruse.
Historikisht, qelizat kanceroze janë shtuar shumë më shpejt që qelizat T të mund të bëjnë një mbrojtje efikase, dhe madje, ato mund të gënjenin qelizat T duke i bërë të “mendojnë” se janë një pjesë e shëndetshme e trupit e jo një tumor kanceroz që duhet ndalur.
Por në trajtimet eksperimentale në qendrën e kërkimeve për kancerin, Fred Hutchinson në Seattle, të dhënat e para tregojnë se Dr. Stanley Riddell ka mundur të trajnojë me sukes qelizat T për të njohur më mirë dhe eleminuar qelizat kanceroze në një periudhë të shkurtër kohore, duke bërë që kanceri t’i drejtohet rrugës së përmirësimit.
Në mënyrë specifike, ai ka marrë qelizat T të një personi në mënyrë që t’i mësonte atyre të njohin specifikisht tipin e kancerit nga i cili vuan pacienti, duke u mundësuar atyre të sulmojnë tumorin; ndërsa nga ana tjetër të mos vrasin qelizat dhe indet e shëndetshme.
Rezultatet
Rezultatet paraprake të Riddell për suksesin e terapisë me qeliza T në kurimin e rasteve që konsideroheshin fatale, ka entuziazmuar takimin e përvitshëm të Shoqërisë Amerikane për Shkencë të Avancuar në Washington, D.C. Entuziazmi vjen nga rezultatet e habitshme: 93 për qind e grupit të vogël me 29 pacientë që kishin kancer të pakurueshëm apo me leuçemi të rikthyer, kishin kaluar në fazën e lehtësimit të sëmundjes pasi i ishin nënshtruar terapisë së Riddell me qelizat imunitare.
Përveç kësaj, 65 për qind e 30 pjesëmarrësve në eksperiment me limfomë gjithashtu kaluan në fazën e lehtësimit të sëmundjes. Por, edhe pse është shumë herët për të raportuar rezultate nga grupet e tjera në eksperiment. Riddell thotë se edhe ata po tregojnë shenja të mira lehtësimi. Në total, Riddell ka trajtuar gati 100 pacientë me terapinë e qelizave T.
“Të gjitha ishin raste që nuk u kishte funksionuar terapia konvencionale, kështu që ata u përkeqësuan pas kimioterapisë. Shumë prej tyre ishin përkeqësuar pas operacioneve të transplantit të palcës ose madje, nuk ishin konsideruar fare për të pasur një transplant. Doktori i cilëson rezultatet shumë inkurajuese, në një intervistë për “Huffington Post”.
Riddell dyshon se terapia e qelizave T ka funksionuar kaq mirë për shkak se kanceret që ai trajtoi ishin të gjitha të gjakut. Në vend që të qëndrojnë në tumore solidë në trupë, qelizat kanceroze qarkullojnë në të gjithë trupin dhe gjithashtu mblidhen në disa vende ku qelizat T grumbullohen zakonisht: plaza e kurrizit, gjaku, gjendrat limfatike dhe shpretka.
Hapi tjetër
Megjithatë, Riddell shpreson se kërkimi i tij mund të riprojektohet për të nisur sulmin nga kancereve më të zakonshme, si ai i gjirit apo i zorrëve. Këto lloje përfaqësojnë vështirësi special pasi tumoret solide zakonisht krijojnë mikromjedisin e tyre që mund të neutralizojë një qelizë T.
“Na duhet të mësojmë të kombinojmë terapinë e qelizave me gjëra të tjera, që mund të jetë një formë vërtet efektive e imunoterapisë për disa pacientë me tumore solide apo të shpikim qeliza T të tilla që të mundësojmë funksionimin e tyre edhe në mjedise që i neutralizojnë”, thotë Riddell.
Ndërsa studimi i tij është ende në fazat e hershme dhe nuk është publikuar ende në një revistë mjekësore, ai shpreson që teknologjia të mund të bëhet e aksesueshme për publikun e gjerë brenda dy apo tre vjetësh.
“Ky është një demostrim tjetër që tregon se sistemi ynë imunitar mund të përdoret për të kuruar kancerin”, është përfundimi që nxjerr Riddell. “Nuk do të thoja ende se terapia është e aplikueshme për të gjitha kanceret, mirëpo mendoj se ka një mundësi këtu dhe drejtimi i kërkimeve është vërtet i dukshëm”. Përgatiti: Juli Prifti – /tesheshi.com/
