Instituti Demokratik i Kosovës, organizata e vetme joqeveritare e cila monitoron punën e Kuvendit të Kosovës, ka konstatuar se viti 2015 ka qenë një vit joefektiv për Kuvendin dhe nuk ka arritur që të përmbushë agjendën legjislative, ashtu siç ishte paraparë.
Kuvendi i Kosovës deri në fund të vitit 2015 ka arritur të realizojë vetëm 34 për qind të punës legjislative
Albert Krasniqi në një konference për media, tha para gazetarëve se viti 2015 për Kuvendin, ka qenë vit i karakterizuar me polarizime të skajshme ndërmjet partive në pushtet dhe atyre në opozitë, që rezultuan me krizën më të madhe politike në vend.
Ai tha se kundërshtimi i marrëveshjes për krijimin e Asociacionit të komunave me shumicë serbe dhe marrëveshjes për demarkacionin me Malin e Zi, kanë qenë pikat kulmore të kësaj përplasje.
“Përmbushja e ulët e agjendës që ka ndodhur deri në fund të vitit, nuk është krejt rezultat i krizës politike që pasoi në sesionin vjeshtor, por kjo krizë e ka përcjellë Kuvendin qysh në fillim të kësaj legjislature”, shtoi ai.
Sipas të dhënave nga KDI, Kuvendi gjatë vitit 2015 ka miratuar 47 projektligje nga gjithsej 138 të parapara.
Nga ligjet e miratuara, 13 kanë qenë ligje të sjella për plotësim nga qeveria. Në procedurë të komisioneve parlamentare kanë mbetur në shqyrtim edhe 24 projektligje, kurse 67 projektligje tjera nuk janë iniciuar fare.
Krasniqi tha se mungesa e transparencës së qeverisë se Kosovës ndaj Kuvendit, në lidhje me procesin e dialogut me Serbinë dhe nënshkrimi i Marrëveshjes për Demarkacionin me Malin e Zi, pati për pasojë bllokimin e jetës parlamentare përgjatë gjithë sesionit vjeshtor.
Ai tha se deputetët opozitarë kanë penguar mbajtjen e seancave plenare me përdorimin e gazit lotsjellës në ambientet e brendshme të Kuvendit.
Sipas tij edhe pse kishte kontrolle të shtuara në hyrje të Kuvendit nuk është arritur të parandalohet futja e gazit lotsjellës në ambientet e brendshme, gjë që përbën dështim të institucioneve të sigurisë.
“Prania e Policisë së Kosovës ka qenë e tepruar në ambientet e Kuvendit dhe jashtë asaj që kemi parë deri tash, ka qenë një lloj militarizimi i Kuvendit”, tha Krasniqi.
Krasniqi më tej tha se ndikimi i ekzekutivit në legjislativ ka vazhduar gjatë gjithë vitit.
“Qeveria ka pas ndikim të shtuar në punën e Kuvendit si në emërimet që janë bërë si dhe në diktimin e seancave plenare, duke kërkuar seanca të jashtëzakonshme përkundër ndërsa Kuvendi kishte vendosur që të mos mbante seanca për sa kohë nuk garantohet një siguri më e madhe prej deputetëve që kishin paraqitur edhe përmes formës së shkruar në kryesi të Kuvendit”, tha Krasniqi./tesheshi.com/
