Lideri i Al Kaeda-s në Gadishullin Arabik, Khalid Batarfi u arrestua tetorin e kaluar në Jemen, sipas një raporti të Kombeve të Bashkuara të lëshuar të enjten.
Batarfi, i njohur si Abu Miqdad al-Kindi, “u arrestua në tetor gjatë një operacioni në El Geida, gjatë të cilit u vra zv.komandanti Saad Atef al Aalaqi“, thuhej në dokumentin e KB.
Rrjeti i Al Kaida-s në Gadishullin Arabik, të cilin Shtetet e Bashkuara e konsiderojnë veçanërisht të rrezikshëm, është i përhapur në Jemen.
Të dhënat mbi atë se kush e arrestoi Batarfin nuk deklarohen.
Ky është konfirmimi i parë i këtij arrestimi, për të cilin u shkrua në tetor nga SITE, një faqe në internet e specializuar në mbikëqyrjen e organizatave ekstremiste.
Sipas të dhënave jozyrtare të botuara nga SITE, arrestimet u bënë nga forcat e sigurimit të Jemenit.
Al Kaeda në Gadishullin Arabik ka marrë përgjegjësinë për disa sulme në Shtetet e Bashkuara dhe Evropë, përfshirë një sulm ndaj një baze ajrore në Florida në 2019 dhe gazetës Charlie Hebdo në Paris në 2015.
Në Jemen, ai gjithashtu kreu sulme kundër rebelëve Huthi dhe forcave qeveritare.
Presidenti i SHBA Joe Biden njoftoi të enjten përfundimin e “mbështetjes” dhe “shitjes së armëve” për koalicionin ushtarak të udhëhequr nga Saudia në Jemen, i cili ka kryer operacione kundër lëvizjes rebele Huthi për vite me rradhë. /tesheshi.com/
