Kujdesi shëndetësor për rreth 1.8 miliardë njerëz në të gjithë botën është i organizuar në ambiente që nuk kanë ujë të pastër, duke i vendosur pacientët dhe punonjësit e kujdesit shëndetësor në rrezik për sëmundje të tilla si COVID-19, paralajmëruan Kombet e Bashkuara.
Një në katër institucione shëndetësore në botë nuk ka akses të drejtpërdrejtë në ujë të pastër, një në tre nuk siguron higjenë adekuate të duarve dhe një në dhjetë nuk ka tualete themelore, sipas Organizatës Botërore të Shëndetësisë (OBSH) dhe Fondit të Fëmijëve të KB (UNICEF).
COVID-19 ka zbuluar dobësitë kryesore në sistemet e kujdesit shëndetësor, duke përfshirë parandalimin dhe kontrollin joadekuat të sëmundjeve infektive, vunë në dukje agjencitë e KB në një raport mbi infrastrukturën sanitare globale.
Infrastruktura sanitare
Infrastruktura sanitare është “baza e luftës kundër COVID-19”, tha Drejtori i Përgjithshëm i OBSH Tedros Adhanom Ghebreyesus në një deklaratë.
“Duke vendosur punëtorë shëndetësorë dhe njerëz që kanë nevojë për trajtim në objektet pa ujë të pastër, tualete të sigurta dhe madje edhe sapun të zakonshëm, ju po rrezikoni jetën e tyre,” tha Drejtorja Ekzekutive e UNICEF Henrietta Fore.
Mangësitë janë veçanërisht të theksuara në vendet më pak të zhvilluara të botës, të cilat ndodhen kryesisht në Afrikë dhe Azi.
Sipas një raporti nga OBSH dhe UNICEF, pajisja e këtyre vendeve me infrastrukturën bazë sanitare do të kërkonte 3.6 miliardë dollarë investime deri në vitin 2030.
Higjena më e mirë thjesht duhet të gjejë një vend në planet e liderëve botërorë për të rindërtuar dhe ndërtuar një botë post-pandemike, theksoi shefja e UNICEF.
“Higjiena më e mirë është një pjesë absolutisht e domosdoshme (e këtyre planeve),” përfundoi Fore. /tesheshi.com/
