Nga Mensur Krasniqi
Që kur Katica Janeva u zgjodh prokurore speciale në Maqedoni, tek e cila do përfundonin dosjet e rënda të pushtetit, nuk gjen rehat jo vetëm ajo por dhe vetë politika, sidomos ajo e kahjes maqedonase. Siç ndodh të në tilla raste, ata që nuk duan – dhe në këtë rast pushteti, meqë ajo nuk është e zgjedhur prej tij – nisin e gërrmojnë tek e kaluara ose tek pema familjare për t’i gjetur cene që hem ta defaktorizojnë e hem t’i ushtrojnë presion tërthorazi.
Së fundi, partia më e madhe opozitare maqedonase, LSDM ka reaguar përmes një komunikate ndaj pretendimeve se prokurorja speciale, Katica Janeva, më herët ka qenë anëtare saj, akuzë e dalë nga pushteti.
“Qendra për manipulime e Nikolla Gruevskit, po mundohen të ngushëllojnë anëtarët të cilët vetëm po nervozohen dhe e humbin besimin nga VMRO-DPMNE-ja. Për gjithë krimet, kriminelët nga qeveria do të japin llogari. Theksojmë se gjitha ato që shfaqen në publik janë të pavërteta, përfshirë këtu edhe pretendimet e tyre se prokurorja speciale ndonjëherë ka qenë anëtare e LSDM-së”, thuhet në deklaratën e partisë së udhëhequr nga Zoran Zaevi.
Reagimi erdhi pasi e përditshmja maqedonase Dnevnik, ditë më parë doli me lajmin se Kativa Janeva ka pasur librezë partiake të LSDM-së e nënshkruar nga ish -kryetari i kësaj partie, Branko Cërvenkovski.
Ndërsa tvNOVA, muaj më parë publikoi një lajm ku thuhej se Katica Janeva ka martuar vajzën e saj me djalin e Sasho Pockovit, i cili që nga viti 2013 është kryetar i degës së LSDM-së në Gjevgjelisë për, e që në zgjedhjet lokale të vitit 2009 ishte në listën e këshilltarëve të kësaj partie. Por këtë të fundit, Katica Janeva, nuk ka dalë ta përgënjeshtrojë.
Ama fakt është se kjo prokurore, e përzgjedhur me propozimin e ndërkombëtarëve dhe pëlqimin e liderëve të partive më të mëdha politike, ende nuk ka hapur asnjë lëndë kundrejt ndonjë funksionari të LSDM-së; ndërkohë që thuajse të gjithë funksionarët e VMRO-së, që nga kryetari Nikolla Gruevski e deri te anëtarët e thjeshtë partiakë, janë paraqitur për të dëshmuar lidhur me lëndë të ndryshme të veprave të kundërligjshme.
E përvec tjerash, edhe përkundër premtimit të saj se do t’i marrë në shqyrtim si rastin “Monstra” dhe si “Lagjen e Trimave”, kjo nuk po ndodh. Si duket, Janeva nuk ka rezultuar zgjedhja e duhur. Së paku deri më tani. /tesheshi.com/
