Marrëdhëniet mes Shqipërisë dhe Greqisë arrijnë në një pikë të lartë krize, pasi ka dështuar firmosja e një marrëveshjeje të përbashkët, e cila u potencua pak kohë më parë kur ministri i jashtëm grek, Nikos Kotzias vizitoi Tiranën.
Gazeta më e rëndësishme në Greqi, Kathimerini bën të ditur se udhërrëfyesi për të cilin u ra dakord qershorin e kaluar mes Shqipërisë dhe Greqisë, për të përmirësuar lidhjet dypalëshe, po shkon drejt fundosjes.
Kathimerini i referohet burimeve diplomatike greke, të cilat paralajmërojnë se nëse bisedimet nuk nisin në mënyrë të shpejtë, plani mund të shpërbëhet.
Sipas së përditshmes, çështjet kryesore ku ndahen dy vendet përfshijnë trajtimin e pakicës etnike greke në Shqipëri, një mosmarrëveshje të pazgjidhur për kufirin detar, si dhe kërkesën e Tiranës për kompensimin e anëtarëve të komunitetit çam, të cilët u dëbuan nga Greqia gjatë dhe pas Luftës së Dytë Botërore.
Greqia ka hedhur poshtë prej kohësh këtë kërkesë të fundit, duke pretenduar se çamët që jetojnë në vend ishin bashkëpunëtorë të nazistëve.
Kathimerini e vë nën akuzë Edi Ramën, pasi sipas saj kryeministri shqiptar ka rritur dozën e nacionalizmit dhe është afruar me Turqinë.
“Retorika nacionaliste e Edi Ramës ka krijuar tensione të freskëta si me Greqinë ashu dhe me Serbinë”, thekson Kathimerini në shkrimin e saj.
Por Athina ka bllokuar marrëveshjen edhe pas vullnetit të Tiranës për të mbyllur bizneset e Gylenit.
Megjithëse e çuditshme, këtë e konfirmon Kathimerini kur shkruan se:
“Mosmarrëveshjet kanë lindur edhe me Turqinë, mbi kërkesën e saj për mbylljen e shkollave muslimane të lidhura me klerikun turk, Fethullah Gulen, i cili sipas Ankarasë, qëndron pas përpjekjes për grusht shteti të dështuar në korrik”.
Po se ç’punë ka Gyleni me marrëdhëniet shqiptaro-greke, kjo vështirë të kuptohet.
Po sipas gazetës greke, autoritetet në Athinë janë të shqetësuara se bashkëpunimi i Ramës me çamët e partisë PDIU do të pengojë përpjekjet e normalizimit, sidomos duke pasur parasysh faktin se Shqipëria do të mbajë zgjedhjet e përgjithshme verën e ardhshme. /tesheshi.com/
