Katër dele për të shmangur mbylljen e shkollës

Nga Alessandro Vinci, Corriere della Sera

John Deere, Valériane Deschamps, Phil Tondus dhe Marguerite Duprès. Këta janë emrat e katër anëtarëve të rinj të shkollës së përgjithshme në Nitting-Voyer-Hermelange, një fshat i vogël në departamentin francez Moselle, jo shumë larg Sarrebourg.

Në dukje nuk ka asnjë të pazakontë. Megjithatë “nxënësit” në fjalë nuk janë gjë tjetër veçse katër dele në pronësi të një blegtori vendas. Kjo është në fakt iniciativa e çuditshme, të cilën prindërit e fëmijëve të fshatit (përfshirë ata të fermerit të deleve) kanë marrë për të protestuar kundër ligjit që parashikon mbylljen e të gjitha shkollave, nëse nuk arrihet një numër minimal nxënësish për vitin e ri shkollor që nis në shtator. Në këtë shkollë në zonën rurale, mungojnë vetëm katër – 94 nga 98 që kërkon ligji – për të shmangur mbylljen e shkollës. Dhe të mendosh që tre vjet më parë, mjaftonin vetëm 90 nxënës.

“Fëmijët numërohen si dele”

Se sa interesohen familjet për këtë çështje, e tregon fakti se nga pikëpamja burokratike asgjë nuk i është lënë rastësisë. Deleve John, Valériane, Phil dhe Marguerite iu caktuan jo vetëm emrat (dhe mbiemrat) e lartpërmendur, por edhe prindërit, një adresë banimi dhe një datëlindje.

“Inspektorati i arsimit i numëron fëmijët tanë si dele”, ankohet nëna e dy fëmijëve të regjistruar, që është caktuar si zëdhënëse e kësaj lëvizjeje proteste – “prandaj kemi arritur në ekstremin e absurdit, duke regjistruar katër dele për të arritur numrin e nevojshëm në funksion të fillimit edhe në këtë shkollë të vitit të ri shkollor”.

Rezultati: ditët e fundit katër kafshët kapërcyen fizikisht portën e shkollës, dhe u vendosën në një vathë të vogël të krijuar enkas për këtë rast në oborr. Në fakt, kjo lloj proteste ndodhi në vitin 2019 në një fshat tjetër të vogël transalpine, Crêts en Belledonne, rreth 30 kilometra nga Grenoble, ku në shkollën e zonës u regjistruan 15 dele.

Një veprim simbolik

Ndërsa nga njëra anë, ka më shumë të ngjarë që precedenti i pesë viteve më parë të ketë shërbyer si frymëzim, nga ana tjetër s’ka asnjë dyshim se lëvizja është e destinuar të mbetet ashtu siç është: një provokim i fortë, që synon të nxitë një ndryshim në të ardhmen të një ligji që vazhdon të penalizojë krahinat më pak të populluara në Francë.

Pra për arsye të dukshme, regjistrimi i deleve nuk do të zyrtarizohet nga autoritetet shtetërore. Prandaj ekzistenca e shkollës në këtë zonë, vazhdon të jetë më e rrezikuar se kurrë. “Ne jemi të harruarit, ata nga fshati, ata që jetojnë shumë larg Parisit, në fund të listës sa i përket shqetësimeve të tyre”, thuhet ndër të tjera në këngë-ankesë të postuar nga prindërit në YouTube që më 10 mars.

Ata duan të grupojnë 30 nxënës studentë në 50 metra katrorë, e njëjta filozofi që po e shndërron vendin në një qendër tregtare. Por a do të mjaftojë kjo protestë që gjërat të ndryshojnë? John, Valériane, Phil dhe Marguerite, tashmë të kthyera në vathën e tyre të zakonshme, nuk duket se u intereson shumë kjo gjë.

Mbyllja e shkollave, sidomos në zonat rurale si pasojë e largimit të njerëzve në qytetet e mëdha apo edhe jashtë vendit për një jetë më të mirë, e ka bërë këtë fenomen shumë më akut në Shqipëri. Sipas të dhënave zyrtare, në katër vitet e fundit, bankave të shkollës u mungojnë 56.000 nxënës, gjë që ka sjellë edhe largimin nga sistemi të 2000 mësuesve.

I njëjti fenomen është dhe në vende fqinjë të rajonit, Kosova sidomos, po ku veçon dhe Greqia, me fshatra drejt braktisjes.

E gjitha kjo, ndër anët negative të globalizmit apo liberalizmit. /tesheshi.com/