Një diplomat i Katarit ka bërë me dije këtë të martë se qeveria e vendit të tij do t’i paguajë rrogat e muajit korrik për nëpunësit e Rripit të Gazës.
Shuma do të shpërndahet nëpërmjet OKB-së, tha në një konferencë shtypi Muhammed el-Emadi, drejtuesi i Komitetit Kombëtar të Katarit për Rindërtimin e Gazës, e se nuk do të jepet për rrogat e forcave të sigurisë.
Ai tregoi në konferencë se kishte marrë një listë me emrat e më shumë se 23.800 nëpunësve në Gaza që i plotësonin kërkesat për tërheqjen e parave.
I ardhur në Gaza që javën e shkuar, pritet nënshkrimi prej tij i një numri projektesh rindërtimi, në një shumë prej 40 milionë dollarësh.
Qeveria e Gazës, e drejtuar nga Hamasi, përballet prej kohësh me një krizë financiare, duke mos qenë në gjendje t’i paguajë rregullisht rrogat e punonjësve.
Udhëzimi për t’u paguar rrogat e muajit të shkuar të nëpunësve të Gazës është dhënë drejtpërdrejt nga emiri i Katarit, Shejh Tamim bin Hamad el-Thani. /tesheshi.com/
