Ministri i Jashtëm i Katarit e ka bërë të qartë se nuk do të ketë negociata me vendet arabe që i kanë ndërprerë marrëdhëniet ekonomike me të nëse nuk do të ketë prapësim në masat e marra.
“Katari është nën bllokadë, nuk ka negociata. Ato duhet të heqin bllokadën për të nisur negociatat. Deri tani nuk kemi parë ndonjë përparim rreth heqjes së bllokadës, që është parakusht për të bërë përpara,” u është shprehur gazetarëve një ditë më parë Shejh Muhammed bin Abdurrahman el-Thani.
Po ashtu, kryediplomati i Katarit ka thënë se do të negociohen çështjet që kanë të bëjnë me Këshillin e Bashkëpunimit të Gjirit, e jo ato jashtë kësaj.
“Gjithçka që nuk lidhet me to [me vendet e Këshillit të Bashkëpunimit të Gjirit] nuk është subjekt i negociatave. Askush nuk ka të drejtë të ndërhyjë në punët e mia. Al Jazeera është çështje e Katarit, politika e jashtme e Katarit mbi çështjet rajonale është punë e Katarit. Dhe nuk do të negociojmë për punët tona.”
Ministri i Jashtëm tha se po pritej për kërkesa specifike nga vendet e Gjirit në mënyrë që përpjekjet për zgjidhjen e krizës të jepnin rezultat, duke shmanguar kërkesat e vagullta, të papërcaktuara.
Një sërë vendesh arabe i ndërprenë para pak kohësh marrëdhëniet diplomatike me Katarin me akuzën se po mbështeste terrorizmin. /tesheshi.com/
